"სიყვარულო, ძალსა შენსა!" — ამ გრძნობის ძალით ბევრი სისულელე გაგვიკეთებია და საბედოს პოვნის დაჟინებული სურვილიც უმეტესობას გამოგვიცდია. იმიტომ, რომ სხვების ცხოვრებაში ადრე გამოჩენილი ცხოვრების თანამგზავრი ჩვენს უბედობას უკეთ გვაგრძნობინებს და მოშავო მაგიასაც აღარ ვერიდებით. ან უბრალოდ ძაფის ნაწყვეტს ვანდობთ ჩვენი მომავლის საიდუმლოებას.

საბედოს ვინაობის გაგება და მარტოობის დასასრულის განჭვრეტა არაერთი გზით გვიცდია და დარწმუნებული ვარ, ეს 7 ცრურწმენა ოდესღაც აუცილებლად გამოგიცდიათ.

1. თითზე დახვეული ძაფი

ალბათ საბედოს სახელით დაინტერესებულ ნებისმიერ თინეიჯერს, ყველაზე სკეპტიკურად განწყობილსაც კი, ერთხელ მაინც გადაუხვევია თითზე ძაფი და ანბანი გადაუთვლია, რათა იმ ერთადერთის სახელის პირველი ასო გაეგო.

შემდეგ მარჩიელობა იწყებოდა — ჯერ ყველაზე სასურველ კანდიდატებში ცდილობდი მოგეძიებინა შესაბამისი სახელის მიჯნური, ბოლოს კი უბრალოდ თავს უმტკიცებდი, რომ ჯერ კიდევ წინ გელოდა შეხვედრა ადამიანთან, რომლის სახელიც ძაფის მიერ ნაწინასწარმეტყველებ "ჭ" ასოზე დაიწყებოდა.

2. მარილიანი კვერები

მომავალი ცხოვრების თანამგზავრები ძირითადად სიზმრებში გვსტუმრობდნენ, მაგრამ ამ სიზმრებს ხელშეწყობა სჭირდებოდა და რა შეიძლება უცხიმოდ გამომცხვარ მარილიან კვერზე უკეთესი იყოს. დაძინებამდე მარილიანი კვერის პორცია და საწოლთან მოდგმული წყლიანი ჭიქა საბედოს დასიზმრების გარანტი იყო.

P.S. შესაძლოა წყლიანი ჭიქა რიტუალის ნაწილი არც არის და უბრალოდ მარილიანი კვერებისგან გამოწვეული წყურვილის მოკვლის ხერხია.

3. დაბადების დღის სანთლები

დაბადების დღეს და მიჯნურობას რა საერთო აქვს? რა თქმა უნდა დაბადების დღის სანთლები, მაგრამ კიდევ ერთი მნიშვნელოვანი დეტალი უნდა გაგეთვალისწინებინა — ბალიში, რომლის ქვეშაც სანთელს ამოდებდი.

ამ რიტუალის დროს, დაძინება სასიყვარულო ყუთის გახსნის და ახალი აღმოჩენებისთვის კარის შეღებას ჰგავდა. გვჯეროდა, რომ სიზმრად ნანახი ადამიანი ადრე თუ გვიან რაშით აუცილებლად მოგვაკითხავდა, ხოლო თუ არასასურველ ადამიანს დაისიზმრებდი, მარტივად შეგეძლო გადაგეწყვიტა, რომ რაღაც არასწორად ქენი.

4. ძილში მოლაპარაკე ადამიანისთვის დასმული კითხვები

თუ ფხიზელი ძილი გქონდა, მიჯნურის სახელის გაგება ძალიან მარტივი იყო, მაგრამ მცირე გამართლება მაინც გჭირდებოდა, ოჯახის რომელიმე წევრის ძილში საუბრის სახით.

როგორც იცით, მძინარე ადამიანს წინასწარმეტყველების ნიჭი აუცილებლად აქვს და მისთვის დასმულ ნებისმიერ კითხვაზე სწორი პასუხის მიღება შეგიძლიათ. მთავარია პასუხად "წყალი მომიტანე" არ მოგიგოთ.

5. ქორწილში დამტვრეული თეფშის ნაწილი

სხვისი ქორწილის ცრურწმენა თქვენი მომავალი საბედოს დასიზმრების ხერხიც რომ იყო? ნატეხის შეუმჩნევლად აწაპვნა ცალკე უნარებს მოითხოვდა, რადგან მათ სახლში წაღების მსურველთა კონკურენციაც მაღალი იყო.

ასე რომ, თუ ერთ ნატეხს მაინც ჩაიგდებდი ხელში, დაბადების დღის სანთლის ნაცვლად ძილის წინ ბალიშის ქვეშ უნდა ამოგედო. სიზმრად კი შენი პრინცი / პრინცესა გამოგეცხადებოდა, რომლის ლოდინის გარდაც სხვა საქმე აღარ გრჩებოდა.

6. ყავაში ჩახედვა

სიყვარულისთვის მოშავო მაგიასაც არ უნდა ერიდო, უფრო სწორად ყავის ნალექისფერ მაგიას. ნალექით ნაქარგ სახეებს, რატომღაც, მხოლოდ განსაკუთრებული ნიჭით დაჯილდოებული ადამიანი ამჩნევდა, უფრო მეტიც — ანბანის ნებისმიერი ასოს ამოცნობაც შეეძლო და გულის გახსნის შემდეგ, იქნებ ქორწინების ზუსტი თარიღი, ბავშვების სქესი, რაოდენობა და ნებისმიერი დეტალი გაგეგო, რასაც ცხოვრება გიმზადებდა.

7. კარტის გაშლა

კარტის გაშლის უამრავი გზა არსებობს, მაგრამ მისი ჯადოსნური მახასიათებლების გასააქტიურებლად მესამე თვალი, მაგიაა საჭირო, რატომღაც დამატებითი თვალი ჩვენს უმეტესობას ჰქონდა და ამიტომ მარტივად შეგვეძლო სიყვარულით დამწვარი ჩვენი გულებისთვის სასიხარულო ან არც ისე სასიხარულო ამბები გვეცნობებინა.

ამჯერად ეს ხერხები გავიხსენეთ. თქვენ თუ იცით საბედოს ვინაობის გაგების ისეთი ხერხი, რომელიც სტატიაში არ გვიხსენებია, კომენტარებში მოგვწერეთ.