კორონავირუსის შემთხვევების ზრდასთან ერთად მეტი ადამიანი რჩება თვითიზოლაციაში, იცავს სოციალურ დისტანციას ან, საყოველთაო კარანტინის გამო, უბრალოდ გარეთ ვერ გადის. ამ ფონზე ვირუსი ერთადერთი რამ არაა, რაც ჩვენს ჯანმრთელობას საფრთხეს უქმნის — მარტოობაც არანაკლებ საზიანოა.

მკვლევრებმა დიდი ხნის წინ დაადგინეს, რა გავლენას ახდენს მარტოობა და საზოგადოებისგან იზოლაცია ჩვენს ორგანიზმზე. ადამიანები, რომლებიც სხვებთან კავშირებს კარგავენ, გაციების უფრო მაღალი რისკის ქვეშ არიან, ემართებათ დეპრესია, უვითარდებათ გულის დაავადებები, აქვთ დაბალი კოგნიტური ფუნქციები და მათი ცხოვრება ხანმოკლეა. ფაქტობრივად, ზიანი, რომელსაც ხანგრძლივი მარტოობა იწვევს მწეველობის ან ჭარბწონიანობის მსგავსია.

იანვარში აშშ-ში ჩატარებული ეროვნული კვლევის შედეგად ცხადი გახდა, რომ თაობა Z-ის 79%, მილენიალების 71% და "ბეიბი ბუმერების" 50% თავს მარტოსულად გრძნობს. ამასთან, გასული ათწლეულის განმავლობაში იმ ადამიანების წილი, რომლებიც რაიმე სახის საზოგადოებრივ ჯგუფში, სპორტულ ლიგებში, მოხალისეთა გუნდებში თუ კლუბებში არიან გაწევრიანებული, 75%-დან 57%-მდე დაეცა. იმისდა მიუხედავად, თუ როგორ გვაშორებს ერთმანეთისგან კორონავირუსი, ჩანს, რომ მოსახლეობის უმეტესობის სოციალური კავშირები და ეგრეთ წოდებული სოციალური ჯანმრთელობა ისედაც საკმაოდ მწირია.

ამგვარად, რამდენადაც იზოლაციაა კორონავირუსის პანდემიასთან ბრძოლის გამართლებული მეთოდი, იმდენად საჭიროა, "მარტოობის ეპიდემიასაც" მოვუძებნოთ შესაფერისი საპასუხო რეაქცია. საინტერესოა, როგორ გავაუმჯობესოთ ჩვენი სოციალური კეთილდღეობა ისე, რომ ინფიცირებისგან თავი დავიცვათ? — პასუხი მარტივია: მოწყობილობით, რომლითაც ახლა ამ სტატიას კითხულობთ.

ადამიანები საყოველთაო მარტოობას ხშირად ტექნოლოგიებს აბრალებენ, ამბობენ, რომ ჩვენ დიდ დროს ვუთმობთ სოციალურ ქსელებში სქროლვას და რეალურ ცხოვრებაში ერთმანეთთან საკმარის კომუნიკაციას არ ვამყარებთ. თუმცა, ჰარვარდის საზოგადოებრივი ჯანდაცვის სკოლის მეცნიერებმა გამოსცეს კვლევა, რომელიც უფრო მრავალმხრივ სურათს გვიჩვენებს: როგორც ჩანს, გაცილებით დიდი მნიშვნელობა აქვს, როგორ ვიყენებთ ინტერნეტ პლატფორმებს, ვიდრე იმას, თუ რამდენ ხანს ვატარებთ ამ პლატფორმებზე. სინამდვილეში, ყველას შეგვიძლია, ციფრული ჩვევების განვითარებით სარგებელი ვნახოთ და შინაარსიანი ადამიანური კავშირების დამყარებას ხელი შევუწყოთ — განსაკუთრებით ახლა, როცა ეს ერთადერთი არჩევანია, სანამ ეპიდემიის გავრცელება შესუსტდება.

არ აქვს მნიშვნელობა კარანტინში ხართ, დისტანციურად მუშაობთ თუ უბრალოდ, ფრთხილობთ, ახლა ყველაზე კარგი დროა სოციალურად ჯანსაღი გზით ტექნოლოგიებში გავარჯიშდეთ. გთავაზობთ რამდენიმე ხერხს, როგორ შეინარჩუნოთ კავშირები პირისპირ კონტაქტის გარეშე.

იკონტაქტეთ პირისპირ — შორიდან

პირისიპირ ურთიერთობის შემდეგ კავშირების შენარჩუნების საუკეთესო გზა ვიდეო-ზარებია, რადგან მიმიკები, სხეულის ენა და კომუნიკაციის სხვა არავერბალური ფორმები სიახლოვის შეგრძნებისთვის მნიშვნელოვანი ფაქტორებია. როცა შესაძლებელია, მესიჯობისა და ტელეფონზე საუბრის ნაცვლად ვიდეო-ზარით დაუკავშირდით მეგობრებს და გაითამაშეთ ის სცენარები, რასაც ჩვეულებრივ ერთად გააკეთებდით. მაგალითად, მოაწყვეთ ციფრული ვახშამი მასთან ერთად, ვისაც სოციალური მედიიდან გაცნობის აპლიკაციიდან დაუახლოვდით ან განიხილეთ ბოლოს გამოსული სერიალები მეგობრებთან ერთად.

გაიღეთ ერთწუთიანი სიკეთე

სოციალურ ქსელში პოსტზე ბევრი ლაიქის დაგროვება ყველასთვის სასიამოვნოა, მაგრამ პირადად მოწერილი შეტყობინება, რომელშიც გულწრფელ კომპლიმენტს გვეუბნებიან თუ მადლიერებას გამოხატავენ უფრო პერსონალურია და მისგან მიღებული განცდა დიდხანს გასტანს. ამგვარად, როცა მეგობრების პოსტებს ათვალიერებთ, შეაჩერეთ სქროლვა და მისწერეთ ერთი ორი კარგი სიტყვა. ბოლოსდაბოლოს, ამ გაურკვეველ დროს სტრესთან საბრძოლველად ყველას ხომ გვჭირდება ცოტა მეტი სიკეთე?!

ჩამოაყალიბეთ საერთო ინტერესის ჯგუფი

კავშირების დამყარებას წინ საერთო ენის გამონახვა უძღვის. რაც არ უნდა იშვიათი ინტერესი გქონდეთ, ყოველთვის არსებობს ონლაინ ერთობა, რომელიც თქვენს მისწრაფებებს იზიარებს და მის წევრებს ერთი სული აქვთ, ამაზე როდის ისაუბრებენ თქვენთან ერთად. გარდა ამისა, არსებობს უამრავი ჯგუფი, სადაც ახალბედა მშობლებს, იშვიათი დაავადების მქონე პაციენტებს ან გაჭირვებულ ადამიანებს ეხმარებიან. გამოიყენეთ ეს ქსელები, რათა იმ საქმით დაკავდეთ, რაც ყველაზე მეტად გაინტერესებთ.

გააღრმავეთ ან გააფართოვეთ ურთიერთობები

მარტოობის გადალახვის ორი გზა არსებობს: "ასაზრდოვეთ" არსებული ურთიერთობები ან ჩამოაყალიბეთ ახალი კავშირები. გადადგით ერთი ციფრული "ნაბიჯი", რომ გააღრმავოთ ურთიერთობები — დაუკავშირდით მეგობარს ან ოჯახის წევრს, რომელთანაც დიდი ხანია არ გისაუბრიათ ან გააფართოვეთ კავშირები — მისწერეთ ისეთ ვინმეს, ვისი გაცნობაც ყოველთვის გინდოდათ.

კორონავირუსის პანდემიამ შეგვახსენა, რომ პირისპირ ურთიერთობებით დაავადებები შეიძლება გავრცელდეს, თუმცა ეს კავშირები, ამავდროულად, ჩვენი კეთილდღეობის საწინდარია. ამგვარად, დროა, ჩვენი ჯანმრთელობისთვის გავიაზროთ, რა მნიშვნელობა აქვს ადამიანურ ურთიერთობებს და ტექნოლოგიები სოციალური კეთილდღეობისთვის გამოვიყენოთ.