რაიან მერფი ნამდვილად აღარ ხუმრობს.

უახლესი მონაცემებით რაიან მერფის ახალი სერიალი რაჩედი (Ratched) სტრიმინგ სერვის ნეტფლიქსზე წელს გამოსულ დებიუტანტ ორიგინალ სერიალებს შორის ყველაზე მეტჯერ ნახეს: პრემიერიდან პირველი 28 დღის განმავლობაში ამ ახალ სატელევიზო შოუს 48 მილიონზე მეტმა ადამიანმა უყურა.

სერიალის პირველი სეზონი, რომელიც რვა ეპიზოდისგან შედგება, 18 სექტემბერს გამოვიდა.

რაჩედი 1975 წელს გამოსული საკულტო ფილმის ვიღაცამ გუგულის ბუდეს გადაუფრინა მიხედვით გადაიღეს და ის ამ ფილმის ერთგვარი პრიქველია: მასში განვითარებული ისტორია გაცილებით ადრეულ მოვლენებზე მოგვითხრობს და კინოსა თუ ლიტერატურის სამყაროში ცნობილი პერსონაჟის, მილდრედ რაჩედის პერსონაჟს უკეთესად გვაცნობს, რომლის როლსაც სარა პოლსონი ასრულებს.

რაიან მერფის სატელევიზიო შოუების მოყვარულები კარგად იცნობენ ისეთი სერიალებით, როგორებიცაა ამერიკული საშინელებათა ისტორია (American Horror Story), ამერიკული კრიმინალური ისტორია (American Crime Story) თუ პოზა (Pose) და როგორც ჩანს, მის შემოქმედებაში საპატიო ადგილი თავისი მაღალი რეიტინგით კი უკვე რაჩედმაც დაიმკვიდრა.

მართალია, რაჩედი 2020 წლის ყველაზე პოპულარული შოუ გამოდგა ნეტფლიქსისთვის, თუმცა მან ამ სტრიმინგ სერვისის ისტორიული რეკორდი ვერ გააუმჯობესა, რომელიც სერიალ მხედვარს (The Witcher) ეკუთვნის: ჰენრი კავილის მონაწილეობით გადაღებული ფენტეზის ჟანრის სერიალი 2019 წელს გამოსვლიდან 4 კვირაში 76 მილიონზე მეტმა მომხმარებელმა ნახა.

ნეტფლქისმა რაჩედის გაგრძელება, ცხადია, უკვე დააანონსა, თუმცა ამ შედეგების შემდეგ, ალბათ, კიდევ უფრო მეტი ენთუზიაზმით შეუდგებიან შემდეგ სეზონებზე მუშაობას.

ასევე იხილეთ: