შესაძლოა, იზოლაციაში მოწყენილობის მოსაკლავად მაგიური შელოცვა ჯერ არ ვიცით, მაგრამ რას იტყვით იმაზე, რომ ჰარი პოტერის ისტორია თავად ჰარი პოტერისგან მოისმინოთ?

დიახ, დენიელ რედკლიფი ერთ-ერთია იმ ცნობილ სახეებს შორის, რომლებიც ამ ჯადოსნური წიგნების სერიის პირველ ნაწილს ჰარი პოტერი და ფილოსოფიური ქვა ყველასთვის ხელმისაწვდომად წაიკითხავენ.

ამის შესახებ მწერალ ჯოან როულინგის ახალმა ონლაინ პლატფორმამ რამდენიმე საათის წინ გაავრცელა ინფორმაცია: დენიელ რედკლიფი, სტივენ ფრაი, დაკოტა ფენინგი, დევიდ ბექჰემი, კლაუდია კიმი, ნომა დუმეზვენი და ედი რედმეინი ამ ჯადოსნური ისტორიის სხვადასხვა თავს წაიკითხავენ.

ჰარი პოტერის წიგნების სერიის პირველი ნაწილის ჩვიდმეტივე თავი ამ ფორმატით ყოველკვირეულად გამოქვეყნდება ვებგვერდზე — harrypotterathome.com და ასევე ხელმისაწვდომი იქნება Spotify-ზე.

აღსანიშნავია, რომ სწორედ ამ წიგნების გახმაურებულ ეკრანიზაციაში მთავარი როლის შემსრულებლის, დენიელ რედკლიფის მიერ წაკითხული წიგნის პირველი თავი "ბიჭი, რომელიც გადარჩა" უკვე გამოქვეყნებულია და ნებისმიერ მსურველს შეუძლია მისი მოსმენა.

ამ წიგნების სერიის ავტორმა და მსოფლიოში ერთ-ერთმა ყველაზე ცნობილმა თანამედროვე ბრიტანელმა მწერალმა, ჯოან როულინგმა ახალი ონლაინ პლატფორმა რამდენიმე კვირის წინ აამოქმედა, რათა თვითიზოლაციაში მასწავლებლებსა და მშობლებს ბავშვებისთვის შემეცნებითი და გასართობი მასალა არ მოჰკლებოდათ, ამავდროულად კი ჰარი პოტერის ნებისმიერი ასაკის ფანს ახალი თავშესაქცევი ეპოვა.