როგორც უკვე იცით, დღეს თბილისის მერმა, კახა კალაძემ გამოთქვა იდეა, რომ შაბათ-კვირას კერძო ტრანსპორტით გადაადგილება საერთოდ აიკრძალოს. მან განმარტა, რომ იდეას "დახვეწა" სჭირდება და ის მას შემდეგ გაჩნდა, რაც საგანგებო მდგომარეობის დროს თბილისში ჰაერის დაბინძურების მაჩვენებელმა დაიკლო.

მსგავსი იდეა გაჩნდა მილანის მერიაშიც. ინფორმაცია ამის შესახებ გუშინ გაავრცელა The Guardian-მა. ამბიციური გეგმის მიხედვით, ქუჩებში ავტომობილების, ველოსიპედების და ქვეითების გზები განცალკევდება.

თვითიზოლაციის შემდეგ, როცა საავტომობილო მოძრაობა 30-75%-ით შემცირდა, იკლო ჰაერის დაბინძურების დონემაც. მილანის მერიაში იმედოვნებენ, რომ მოქალაქეები სამსახურებში დაბრუნდების შემდეგ საჯარო ტრანსპორტისა და ავტომობილების გამოყენებას შეამცირებენ.

სწორედ ამიტომ, მილანი აპირებს, რომ ზაფხულის განმავლობაში ქუჩების 35-კილომეტრიანი მონაკვეთი გარდაქმნას და გაზარდოს ველოსიპედისტებისა და ქვეითების სამოძრაო ზოლები.

"წლების განმავლობაში ვმუშაობდით, რომ ავტომობილების გამოყენების სიხშირე შეგვემცირებინა. ყველამ რომ მანქანა ატაროს, ადამიანებისთვის სამოძრაოდ სივრცე აღარ იქნება. ვფიქრობთ, რომ მილანი ახლებურად უნდა წარმოვიდგინოთ", — განაცხადა ქალაქის მერის მოადგილემ, მარკო გრანელიმ.

რაც შეეხება თბილისს, როგორც კალაძე ამბობს, მას ამ საკითხზე საზოგადოების აზრი აინტერესებს და ამიტომ იდეასთან დაკავშირებით ინტერაქტივიც იქნება.