ოპრა უინფრის სახელის ხსენებისას პირველი სიტყვები რაც ადამიანს თავში მოსდის არის - კეთილი, ძლიერი, მებრძოლი, გავლენიანი და ლეგენდარული.

დიახ, ოპრა უინფრი ნამდვილად იმსახურებს ამ ეპითეტებს რადგან მთელი მისი ცხოვრება ერთ ფრაზაში - მსოფლიოს უკეთესობისკენ შეცვლაში, ერთიანდება.

ერთ-ერთი ყველაზე მდიდარი ქალი, საკუთარ ნიჭს ყველა იმ საქმეში ავლენს, რომელსაც ხელს მოჰკიდებს, უპირველესად კი ადამიანებთან ურთიერთობაში.

ღარიბ ოჯახში დაბადებულმა ოპრამ შეძლო და მიუხედავად მრავალი დაბრკოლებისა, ამერიკული ოცნების ყველაზე დიდი მაგალითი გახდა.

მისი ცხოვრება სავსეა ტკივილით, დარდითა და პირადი ტრაგედიებით. ჯერ კიდევ თინეიჯერობისას ის საკუთარმა ნათესავმა გააუპატიურა. ოპრა დაორსულდა, თუმცა ბავშვი მშობიარობის დროს დაიღუპა.

დღეს უკვე ლეგენდად ქცეული ტელეწამყვანი, არაერთხელ გამხდარა რასიზმის მსხვერპლიც. მას საკუთარ გადაცემაშიც კი აყენებდნენ შეურაცხყოფას, თუმცა მისი პასუხი ყოველთვის იმდენად ღირსეული, ამომწურავი და ძლიერი იყო, რომ საბოლოოდ ყველა ბოდიშს უხდიდა.

დაუღალავი და მძიმე შრომის შემდეგ კი მისი ვარსკვლავი დაიბადა. 1986 წლის 8 სექტემბერს პირველად გავიდა ოპრა უინფრის შოუ, გადაცემა, რომელმაც ყველაზე რეიტინგული ტელეშოუს სტატუსი 25 წელზე მეტხანს შეინარჩუნა.

2011 წელს, კარიერის პიკში მყოფმა ოპრამ საკუთარი შოუ დახურა და ახალი, კიდევ უფრო გრანდიოზული გეგმებით წარსდგა მაყურებლის წინაშე.

წლიდან წლამდე ოპრას პოპულარობა სულ უფრო იზრდება და დღესაც კი, ის მსოფლიოში ერთ-ერთი ყველაზე გავლენიანი ქალია, რომელიც მართლა ახერხებს სამყაროს უკეთესობისკენ შეცვლას.

გთავაზობთ ათ საინტერესო ფაქტს ცოცხალ ლეგენდაზე:

1. ოპრას ოჯახი იმდენად ღარიბი იყო, რომ ბავშვობაში კარტოფილის ტომრისგან შეკერილი ტანსაცმლით დადიოდა

2. ოპრა უინფრი პირველი შავკანიანი ქალია, რომელიც მილიარდერი გახდა. 2013 წელს კი ოპრა უინფრი ბარაკ ობამამ აშშ-ის ყველაზე საპატიო, საპრეზიდენტო მედლით დააჯილდოვა

3. მიღებული აქვს საპატიო ოსკარი და ოქროს გლობუსი

4. თავის უზარმაზარ სახლში ბოსტნეულის საკუთარი ბაღი აქვს გაშენებული

5. მისი ახლო მეგობრები არიან - გაელ კინგი, სტივენ სპილბერგი, ჯულია რობერტსი, პოლ მაკარტნი, ტინა ტერნერი და ა.შ.

6. ყოველწლიურად ხარჯავს მილიონობით დოლარს ქველმოქმედებაში. აქვს ფონდი, რომელიც ზრუნავს იმაზე, რომ განათლების მიღების საშუალება ყველას ჰქონდეს

7. კარიერის განმავლობაში მონაწილეობა აქვს მიღებული 33-ზე მეტ ფილმსა და სერიალში. 1986 წელს ნომინირებული იყო ოსკარზე

8. არის 10-ზე მეტი წიგნის ავტორი, რომელთაგან ყველა ბესტსელერი გახდა

9. მისი უდიდესი წარმატების შემდეგ გაჩნდა ტერმინი - ოპრას ეფექტი

10. ფლობს უძრავ ქონებას თითქმის მთელი ამერიკის მასშტაბით