ბაკურ სულაკაურის გამომცემლობის ინიციატივით, საქართველოს ფრანგული ინსტიტუტისა (Institut Français de Géorgie) და სასტუმრო Rooms Hotels-ის ხელშეწყობით 29 ნოემბერს საქართველოს ბელგიელი მწერალი ერიკ-ემანუელ შმიტი ეწვევა.

30 ნოემბერს, 12:00 სთ-ზე საქართველოს პარლამენტის ეროვნული ბიბლიოთეკის საპრესკონფერენციო დარბაზში გაიმართება ავტორის შეხვედრა მედიასთან. პრესკონფერენციაზე დასწრება მედიის ნებისმიერ წარმომადგენელს შეეძლება. ვიზიტის ფარგლებში დაგეგმილია შეხვედრები გამომცემლობის წარმომადგენლებთან, საფრანგეთის ელჩთან საქართველში და ფრანკოფონებთან, 30 ნოემბერს კი, 19:00 სთ-ზე საქართველოს პარლამენტის ეროვნული ბიბლიოთეკის დიდ დარბაზში მწერალი მკითხველს შეხვდება. შეხვედრის მოდერატორი მთარგმნელი მერაბ ფიფია, ხოლო თარჯიმანი მებო ნუცუბიძე იქნებიან. შეხვედრისას მწერალი ისაუბრებს თავის შემოქმედებაზე, უპასუხებს მკითხველთა შეკითხვებს და დაარიგებს ავტოგრაფებს. დასწრება მსურველებს მოსაწვევებით შეეძლებათ.

ერიკ-ემანუელ შმიტი ბოლო ათწლეულის ერთ-ერთი ცნობილი და პოპულარული ფრანგულენოვანი ავტორია. მკითხველებისა და კრიტიკოსებისგან აღიარებული მწერალი, დრამატურგი და რეჟისორი რამდენიმე პრესტიჟული ლიტერატურული და თეატრალური პრემიის მფლობელია. მისი ნაწარმოებები თარგმნილია 40-ზე მეტ ენაზე, სპექტაკლები კი 50- მდე ქვეყანაშია დადგმული. ბაკურ სულაკაურის გამომცემლობამ ერიკ-ემანუელ შმიტის არაერთი ნაწარმოები გამოსცა, მათ შორის: "ოსკარი და ვარდისფერი ქალბატონი", "პილატეს სახარება", "ნოეს შვილი", "ბატონი იბრაჰიმი და ყურანის ყვავილები" და "ულისე ბაღდადიდან".