მსახიობმა ბიზი ფილიპსმა თავის ახალ წიგნში, This Will Only Hurt a Little, არაერთ საიდუმლოს ახადა ფარდა. მათ შორის არის მისი ისტორია ჯეიმს ფრანკოსთან დაკავშირებითაც, რომელთან ერთადაც ის 1999 წელს, სერიალ Freaks and Geeks-ში თამაშობდა.

ფრანკოსთან მუშაობის გამოცდილებას ბიზი არასასიამოვნოდ იხსენებს და წერს, რომ გადასაღებ მოედანზე გამუდმებით ჩაგრავდა.

ბიზი წიგნში წერს, რომ ფრანკოს არასასიამოვნო საქციელების გამო მათ შორის ცუდი ურთიერთობა ჩამოყალიბდა.

"მას სურდა, რომ მისი პერსონაჟი ყოველთვის პირველი ყოფილიყო. მე მისი შეყვარებულის როლს ვასრულებდი და ყოველთვის, როდესაც საერთო სცენას ვიღებდით ცდილობდა ჩემთვის რამე ეტკინა, დამცინოდა და უხერხულ კომენტარებს მიკეთებდა. გარდა ამისა, რეჟისორს გამუდმებით ეუბნებოდა, რომ ჩემთვის დამოუკიდებელი ისტორია არ მოეცა, რადგან მხოლოდ მის გარშემო უნდა მეტრიალა. ერთ-ერთი სცენის გადაღების დროს, სადაც მანქანისკენ მიმავალი ფრანკოსთვის ხელი უნდა მომეკიდა, მან მკლავებზე მომიჭირა ხელი და მიყვირა - 'აღარასდროს გაბედო შემეხო', შემდეგ კი ხელი მკრა. მეორე დღეს მოვიდა და მომიბოდიშა, თუმცა ამის მიზეზი მხოლოდ ის გახდა, რომ ფრანკოს ბოდიშის მოხდა რეჟისორმა და პროდიუსერმა დაავალეს", - წერს ბიზი.

ამავე წიგნში, ბიზი ყვება რომ 14 წლის ასაკში გააუპატიურეს. ამის შესახებ მან ინსტაგრამზეც დაპოსტა და კიდევ ერთხელ აუხსნა საზოგადოებას, თუ რატომ უჭირთ ძალადობის მსხვერპლ ქალებს ხმამაღლა მოყვნენ ის საზარელი ისტორიები, რომლებიც მათ გადახდათ.

რაც შეეხება ჯეიმს ფრანკოს, ბიზი ფილიპსამდე ის რამდენიმე ქალმა დაადანაშაულა სექსულურ შევიწროებაში, მათ შორის სამი ფრანკოს ყოფილი სტუდენტია.