ჰარი პოტერის ვარსკვლავმა, ემა უოტსონმა ქალს, რომელიც 2012 წელს აბორტის აკრძალვას ემსხვერპლა ღია წერილი მიუძღვნა.

"შენ არ გინდოდა გამხდარიყავი ამ მოძრაობის სახე, უბრალოდ გსურდა მიგეღო ის სამედიცინო მომსახურება, რომელიც შენს სიცოცხლეს გადაარჩენდა. 2012 წელს, როდესაც შენი გარდაცვალების ამბავი გავრცელდა, აქტივისტები მთელი ირლანდიელი ქალების მხარდასაჭერად გაერთიანდნენ და კონსტიტუციის მერვე შესწორება გააპროტესტეს", - წერს ემა უოტსონი.

სალიტა ჰალაპანავერი 17 კვირის ორსული იყო, როდესაც გოლუეის საავადმყოფოს აბორტის გასაკეთებლად მიაკითხა. იმის გამო, რომ ექიმმა ის მოსალოდნელი რისკის შესახებ არ გააფრთხილა, ქალი გარდაიცვალა.

"იმის გამო, რომ შენ დაიძინე, ბევრი ადამიანი გამოაფხიზლე და ჩვენს გონებაში ხარ. შენი და სხვა ქალების სახელით ვაგრძელებთ ბრძოლას იმ სამართლიანობისთვის, რომლის მიღწევაც ასეთი რთულია", - წერია სტოუნის წერილში.

შეგახსენებთ, რომ რამდენიმე თვის წინ ირლანდიაში ისტორიული რეფერენდუმი ჩატარდა, მოსახლეობის უმრავლესობამ აბორტის ლეგალიზაციას მხარი დაუჭირა. მანამდე აბორტი მხოლოდ იმ შემთხვევაში იყო შესაძლებელი, თუ ორსულობა დედის ჯანმრთელობას უქმნიდა საფრთხეს.

25 მაისის რეფერენდუმზე ამომრჩეველს ირლანდიის კონსტიტუციის მერვე შესწორების შენარჩუნებისთვის ან გაუქმებისთვის უნდა მიეცათ ხმა. სწორედ ეს მერვე შესწორება კრძალავდა აბორტს და ემბრიონის სიცოცხლის უფლებას იცავდა. მასში ნათქვამი იყო, რომ ჩასახვის დღიდანვე ჯერ კიდევ არდაბადებულ ბავშვს სიცოცხლის ისეთივე უფლება აქვს, როგორც ორსულ ქალს. შესწორება 1983 წელს რეფერენდუმის შედეგად მიიღეს.

ახლა ირლანდიის პარლამენტს შეეძლება, მიიღოს კანონი, რომლის მიხედვითაც ქალს აბორტის გაკეთება ორსულობის 12 კვირამდე შეეძლება. 12 კვირის შემდეგ აბორტი დასაშვები იქნება თუ ქალის სიცოცხლეს საფრთხე ემუქრება. პრემიერ-მინისტრმა განაცხადა, რომ ახალი კანონი ძალაში წელსვე შევა.

რეფერენდუმში მონაწილეობის მისაღებად და მერვე შესწორების გაუქმებისთვის ხმის მისაცემად ირლანდიის ათასობით მოქალაქე ქვეყანაში დაბრუნდა.