ანტისემიტური, რასისტული და პრო-ნაცისტური კომენტარების გამო, პოლონეთში კანიე ვესტის კონცერტი გაუქმდა.

კანიე ვესტს, რომელიც ასევე ცნობილია როგორც Ye, 19 ივნისს, პოლონეთში კონცერტი უნდა ჩაეტარებინა, თუმცა გასულ პარასკევს სტადიონის ადმინისტრაციამ განაცხადა, რომ პერფორმანსი "ფორმალური და სამართლებრივი მიზეზების გამო" აღარ ჩატარდება.

ფოტო: People

აღსანიშნავია, რომ კონცერტის გაუქმების შესახებ ინფორმაცია მას შემდეგ გავრცელდა, რაც ვესტმა საფრანგეთში დაგეგმილი კონცერტი გააუქმა, ხოლო დიდმა ბრიტანეთმა მას ქვეყანაში შესვლა აუკრძალა.

შეგახსენებთ, რომ ვესტმა გასული წლის თებერვალში სვასტიკიანი მაისურების გაყიდვა დაიწყო, რის გამოც პლატფორმა Shopify-მ მისი ინტერნეტ-მაღაზია გააუქმა. თუმცა, ვესტი ამით არ დაკმაყოფილდა და სამი თვის შემდეგ გამოუშვა სიმღერა, სახელწოდებით Heil Hitler.

ფოტო: Matt Winkelmeyer / Getty Images / The Recording Academy

მიუხედავად ამისა, იანვარში, ახალი ალბომის გამოშვებამდე, რეპერმა ანტისემიტური განცხადებებისათვის ბოდიში მოიხადა.

"მე არ ვარ ნაცისტი ან ანტისემიტი. მე მიყვარს ებრაელი ხალხი", — თქვა მუსიკოსმა. ვესტმა ასევე დაამატა, რომ ბიპოლარული აშლილობის გამო მას "დაკარგული ჰქონდა რეალობის შეგრძნება"

აღსანიშნავია, რომ პოლონეთში ნაცისტური სიმბოლიკის პროპაგანდა სისხლის სამართლის დანაშაულია და ნაციზმის საჯარო პროპაგანდისთვის ადამიანი შესაძლოა, სამ წლამდე ვადით დააპატიმრონ.

ფოტო: NPR

სტადიონის ოფიციალურ განცხადებამდე, კულტურის სამინისტროს სპიკერმა BBC-ს განუცხადა, რომ კონცერტის გაუქმება მარტივი არ იყო, რადგან არ არსებობდა კონკრეტული კანონი, რომელიც ამას პირდაპირ კრძალავდა. მისივე თქმით, პოლონეთის საგარეო საქმეთა სამინისტროც იზიარებდა იმ პოზიციას, რომ კონცერტი არ უნდა ჩატარებულიყო.

შეგახსენებთ, რომ ვესტი ლონდონში Wireless Festival-ის ჰედლაინერი უნდა ყოფილიყო, თუმცა ფესტივალი იძულებული გახდა კანიეს კონცერტი გაეუქმებინა, რადგან ბრიტანეთის მთავრობამ მუსიკოსს ვიზა არ მისცა.