სანამ ამ საღამოს ნაგვის პარკს თავს მოუკრავ და ურნაში გადაუძახებ, დაფიქრდი, იქნებ არ ღირს ასეთი ტრენდული აქსესუარის თავიდან მოშორება. სხვა თუ არაფერი, არ გახსოვს, ბალენსიაგამ რომ გვიჩვენა, როგორი მოდური ჩანთა შეიძლება შეიქმნას ნაგვის პარკის შთაგონებით?

სწორედ ეს $1790-იანი ჩანთა მოაგონა ინტერნეტმომხმარებლებს ჩვეულებრივმა პოლიეთილენის პარკმა, რომელიც სოციალური ქსელების უახლეს ტრენდად იქცა. ყველაფერი კი პეკინის საერთაშორისო კინოფესტივალის წითელ ხალიჩაზე დაიწყო, სადაც ელეგანტურ შავ კაბაში გამოწყობილი მსახიობი ჯანგ ძინგი უჩვეულო აქსესუარით გამოჩნდა. 26 წლის ვარსკვლავს ხელში ჩანთის ნაცვლად ყვითელი პარკი მოემარჯვებინა.

ფოტო: yuyicious; diagold12 / X

ძინგის ფოტოები ინტერნეტს ვირუსულად მოედო და ზოგან გავრცელდა არასწორი ინფორმაცია, რომ ყვითელი პარკი მაღალი მოდის უახლესი ნიმუში გახლდათ; უფრო ზუსტად, ამტკიცებდნენ, რომ ეს სწორედ ბალენსიაგას სახელგანთქმულ ჩანთად ქცეული ნაგვის პარკი იყო. თუმცა, რეალურად, ჩინელი მსახიობის თვალშისაცემი ლუქის ეს დეტალი სულაც არ ყოფილა ბრენდული აქსესუარი. ძინგიმ განმარტა, რომ ნივთი, უბრალოდ, მინიშნება იყო თავის ახალ ფილმზე, სადაც მსახიობის პერსონაჟი სმენადაქვეითებულ მშობლებთან კომუნიკაციისთვის სწორედ პოლიეთილენის ყვითელ პარკს იყენებს.

თუმცა, რასაკვირველია, სოციალური ქსელის მომხმარებლებისთვის ამ განმარტებას ხელი არ შეუშლია, მოდური პარკი აეტაცებინათ. ცხადია, ტრენდს არც ქართველი კონტენტ კრეატორები არ ჩამორჩნენ...

მართალია, ამ კონკრეტულ ნივთს ბალენსიაგას ვერცერთ კოლექციაში ვერ შეხვდებით, მაგრამ, როგორც გითხარით, ნაგვის პარკი თავის დროზე ნამდვილად იყო ბრენდის ერთ-ერთი ყველაზე განხილვადი აქსესუარი.

"მსოფლიოში ყველაზე ძვირადღირებული ნაგვის ჩანთის შექმნის შესაძლებლობას ხელიდან ვერ გავუშვებდი. ვის არ უყვარს მოდაში სკანდალი?", — განაცხადა 2022 წელს ქართველმა დიზაინერმა დემნამ, რომელიც მაშინ ბალენსიაგას ხელმძღვანელობდა.