დენიელ რედკლიფმა ScreenRant-სთვის მიცემულ ვიდეოინტერვიუში თქვა, რომ მომავალში ჟურნალისტებმა მუდმივად არ უნდა ჰკითხონ ახალი ჰარი პოტერის მსახიობებს ძველი მსახიობების შესახებ. HBO-ს სერიალში მთავარი როლი დომინიკ მაკლაფლინმა მიიღო, ჰერმიონს არაბელა სტენტონი ითამაშებს, ხოლო რონის როლს ალასტერ სტაუტი შეასრულებს.

ასევე ნახეთ: ჰარი პოტერის სერიალი წიგნს (ცოტათი) გადაუხვევს — რა გავიგეთ პირველ სეზონზე

"როცა ეს ბავშვები შეარჩიეს, ინტერნეტში დაიწყო საუბარი, რომ ყველა უნდა მოვუფრთხილდეთ მათ", — თქვა რედკლიფმა — "თუ მართლა ასე ფიქრობთ, ერთ-ერთი გზა ისაა, რომ მუდმივად არ ჰკითხოთ ჩვენზე — ჩემზე, ემაზე და რუპერტზე. არ მინდა, რომ ამ ბავშვების ცხოვრებაში უცნაურ აჩრდილებად ვიყოთ. უბრალოდ აცადეთ, თავიანთ საქმეს მიხედონ, ეს სერიალი იქნება ახალი, განსხვავებული რამ. და დარწმუნებული ვარ, დომინიკი ჩემზე უკეთესიც იქნება".

რედკლიფმა გასულ წელს Good Morning America-ში გაამხილა, რომ მაკლაფლინს როლზე შერჩევის შემდეგ წერილი მისწერა. ახალგაზრდა მსახიობმა მოგვიანებით თქვა, რომ რედკლიფის მხარდაჭერის მიღება "შოკისმომგვრელი" იყო და “სიხარულისგან გაგიჟდა”.

"დომინიკს წერილი მივწერე და მანაც ძალიან თბილი პასუხი გამომიგზავნა", — თქვა რედკლიფმა — "არ მინდა, ამ ბავშვების ცხოვრებაში აჩრდილად ვიყო, მაგრამ მინდოდა მეთქვა: იმედი მაქვს, ყველაზე კარგად გაატარებ ამ დროს და ჩემზე უკეთესიც იქნება შენი გამოცდილება, მე ძალიან კარგი დრო ვატარე, მაგრამ იმედი მაქვს, შენ კიდევ უფრო უკეთესად გაერთობი. და მართლაც, ვხედავ მის და სხვა ბავშვების ფოტოებს და უბრალოდ მინდა, ჩავეხუტო. ისეთი პატარები ჩანან. მათ რომ ვუყურებ, ვფიქრობ: "რა სიგიჟეა, ამ ასაკში რომ ამას ვაკეთებდი". მაგრამ ამავდროულად ძალიან ტკბილია ეს ყველაფერი და იმედი მაქვს, ისინი მშვენივრად ერთობიან".

რუპერტ გრინტმაც მსგავსი წერილი მისწერა ალასტერ სტაუტს, რომელიც სერიალში რონ უიზლის როლს ითამაშებს. როგორც გრინტმა გასულ წელს BBC-ს უთხრა: "წერილი მივწერე მანამდე, სანამ მუშაობას დაიწყებდნენ, თითქოს ესტაფეტას ვაბარებდი. უბრალოდ ვუსურვე ყველაფერი საუკეთესო. ამ სამყაროში ყოფნა ჩემთვის დიდი სიამოვნება იყო და იმედი მაქვს, მასაც იგივე გამოცდილება ექნება… უცნაურია, რომ ეს ციკლი ისევ მეორდება. ძალიან მაინტერესებს, როგორი იქნება".

მიუხედავად იმისა, რომ რედკლიფისთვის ჰარი პოტერის გამოცდილება ძალიან ძვირფასია, თქვა, რომ საკუთარ ფილმები სულ რამდენჯერმე აქვს ნანახი და იხუმრა კიდეც, რომ შვილებს უფრო სიამოვნებით აჩვენებს HBO-ს ახალ ვერსიას.

"ალბათ ჩემს შვილს ამ ახალ სერიალს ვაჩვენებ, რომ ჩემი ყურება არ მოუწიოს", — თქვა რედკლიფმა — "მგონი ეს უფრო სახალისო იქნება. ალბათ მეც უფრო მეტ სიამოვნებას მივიღებ… ზოგადად, საკუთარი თავის ყურება არ მიყვარს. ძველი ფილმების ნახვა უფრო მსიამოვნებს, რადგან მათგან უკვე უფრო შორს ვარ".

თუ ჰარი პოტერი გიყვარს: On.ge-ის 10 ქვიზი, რომელიც ჰარი პოტერის ჯადოსნურ სამყაროში გამოგზაურებს