ამერიკელი პოპვარსკვლავი ბილი აილიში, რომელიც, ამავდროულად, გარემოს აქტიური დამცველიცაა, თავის ახალ, რიგით მესამე სტუდიურ ალბომს ეკომეგობრულ ფირფიტებზე ჩაწერილს გამოუშვებს. აილიშმა ახალი ნამუშევარი, სახელწოდებით Hit Me Hard And Soft, 8 აპრილს დააანონსა. მუსიკოსის თქმით, სინგლების ცალ-ცალკე გამოშვებას არ აპირებს — ალბომს ერთიანად მოვისმენთ 17 მაისს.

• ბილი აილიშმა ახალი ალბომი დააანონსა

ციფრულ სტრიმინგ პლატფორმებზე განთავსებასთან ერთად, Hit Me Hard And Soft ვინილის ფორმატითაც გამოვა. თუმცა, ალბომი გამორჩეული იქნება იმით, რომ მისი მთლიანი შეფუთვა გადამუშავებული მასალისგან დამზადდება. ამასთან, გამოიყენებენ მცენარეული წარმოშობის მელანს და წყლის ბაზაზე დამზადებულ ლაქს. ვინილის ყუთი არც პლასტმასის ცელოფანში იქნება მოქცეული — ის 100%-ით გადამუშავებული და გადამუშავებადი მასალისგან დამზადდება.

ვინილები კი ციფრულ ეპოქაში პოპულარობას იბრუნებს. Statista-ის ცნობით, ზედიზედ მე-16 წელია, რაც აშშ-ში ფირფიტების გაყიდვები იზრდება — მხოლოდ გასულ წელს ამ ფორმატით 41 მილიონზე მეტი ასლი გაიყიდა. თუმცა, ფირფიტები პლასტმასისგან მზადდება, რის გამოც მისი გამოშვება უარყოფითად ზემოქმედებს გარემოზე. კილის უნივერსიტეტის მკვლევრების თქმით, ვინილი, საშუალოდ, 135 გრამ პოლივინილქლორიდს (თერმოპლასტიკური სინთეზური პლასტმასა) შეიცავს, მისი დამზადებისას კი, გარემოში ნახევარ კილოგრამამდე ნახშირბადის დიოქსიდი გამოიყოფა. გაერთიანებულ სამეფოში, მაგალითად, მხოლოდ ვინილების დამზადების (და არა მათი შეფუთვის ან ტრანსპორტირების) შედეგად, 2 700 ტონამდე CO₂ გამოიყო.

22 წლის ბილი აილიშმა კი წინათ თავისი კოლეგებიც გააკრიტიკა ვინილის ფორმატით ალბომის რამდენიმე ვარიანტის გამოშვების გამო. მართალია, Hit Me Hard And Soft-იც ვინილის რვა ვარიანტით გამოვა, მაგრამ ყველა მათგანს ერთი გარეკანი და სიმღერების ერთნაირი ჩამონათვალი ექნება. სტანდარტული ვარიანტი 100%-ით გადამუშავებული მასალისგან დამზადდება, დანარჩენები კი — ეკომიქსით ან ბიოვინილით. ეკომიქსი სხვა ალბომების დამზადებისგან მორჩენილი მასალის გადამუშავებით იქმნება, ბიოვინილი კი პოლივინილქლორიდის საწარმოებლად ნავთობის ნაცვლად საკვების გადამუშავებულ ზეთს გამოიყენებს. ეს უკანასკნელი ნახშირბადის ემისიებს 90%-ით ამცირებს.

ამ ყველაფერთან ერთად, ბილი აილიშის ტურნესთვის სხვადასხვა სასაჩუქრე ნივთი ("მერჩენდაიზი") ასევე გადამუშავებული ნარჩენებისგან დამზადდება.

"ჩემი მშობლები ყოველთვის მეუბნებოდნენ, რომ ჩვენს ყველა გადაწყვეტილებას სადმე ან ვინმეზე გავლენა აქვს — ცუდი ან კარგი. ამაზე სულ მეფიქრება ხოლმე", — აღნიშნავს აილიში, — "ვერ უგულებელვყოფ იმას, რაც ვიცი და უმოქმედოდ ვერ გავაგრძელებ ჩემს კარიერას. ასე გამზარდეს და ასე მინდა, რომ ვიცხოვრო".

აღსანიშნავია, რომ ბილი აილიში, ისევე, როგორც მისი ძმა და სიმღერების თანაავტორი ფინეას ო'კონელი, ვეგანია. მუსიკოსმა Nike-თან ითანამშრომლა ვეგანური ფეხსაცმლის გამოსაშვებად, მოგვიანებით კი, ვეგანური პარფიუმერიის წარმოებაც დაიწყო. აილიში ასევე არ თანამშრომლობს ბრენდებთან, რომლებიც ბეწვს იყენებენ — 2021 წლის Met Gala-ზეც მან იმ პირობით მოირგო ოსკარ დე ლა რენტას კაბა, რომ მოდის სახლი ბეწვის გამოყენებაზე უარს იტყოდა.