ბრიტნი სპირსმა ცოტა ხნის წინ ინსტაგრამზე პოსტი გამოაქვეყნა და ახალი ალბომის შესახებ გავრცელებულ ჭორებს გამოეხმაურა. მომღერლის თქმით, არანაირ ახალ ალბომზე არ მუშაობს და უფრო მეტიც, მუსიკალურ ინდუსტრიაში დაბრუნებას არც არასდროს აპირებს. ბოლო პერიოდში მედიაში გავრცელდა ჭორები, რომ ბრიტნი სპირსი ჯულია მაიკლსთან ერთად ახალ ალბომზე მუშაობდა, ბრიტნიმ კი ეს ყველაფერი უარყო.

"ჭორები ვრცელდება, თითქოს ახალი ალბომის შესაქმნელად სხვადასხვა ადამიანს მივმართავ. სინამდვილეში, მუსიკალურ ინდუსტრიაში არასდროს დავბრუნდები! მუსიკას ახლა სხვებისთვის ან გასართობად ვწერ. ბოლო 2 წლის განმავლობაში სხვებისთვის 20-ზე მეტი სიმღერა დავწერე", — ვკითხულობთ ბრიტნის ინსტაგრამის პოსტში.

ბრიტნი ახლახან გამოსული მემუარების, სახელად The Woman in Me-ის, შესახებ გავრცელებულ ჭორებსაც გამოეხმაურა. ბრიტნის თქმით, ტყუილია, თითქოს მემუარები მისი ნებართვის გარეშე დაიბეჭდა. შეგახსენებთ, რომ მემუარებში მომღერალი ისეთ ისტორიებსა და გამოცდილებებს გვიზიარებს, რომლებიც აქამდე საზოგადოებისთვის ცნობილი არ იყო.

The Woman in Me 2023 წლის ოქტომბერში გამოვიდა და დღეს უკვე ბესტსელერია. გამოსვლიდან მხოლოდ 1 კვირაში ბრიტნის მემუარების 1,1 მილიონზე მეტი ეგზემპლარი გაიყიდა.