ეროვნულმა არქივმა დიდ საიდუმლოს ახადა ფარდა და ათასობით ადამიანის ეჭვი გააქარწყლა — უკვე თამამად შეგიძლიათ ამტკიცოთ, რომ თბილისის ზოოპარკში ჟირაფი გინახავთ. თურმე, აფრიკული ეკოსისტემის ეს თვალსაჩინო წარმომადგენლები თბილისში 1962 წელს დასახლდნენ.

ჟირაფების, ბობისა და ნეს თბილისური ცხოვრების უნიკალური კადრები დღეს გავრცელდა. როგორც ვიგებთ ბობი ნეზე მთელი 20 სანტიმეტრით მაღალი იყო და 4 მეტრსა და 30 სანტიმეტრს აღწევდა. თუმცა როგორც ჩანს, სიმაღლე დაბრკოლებას არ წარმოადგენდა, რადგან ისინი ერთმანეთის გარეშე წუთსაც კი ვერ ძლებდნენ.

ამის გარდა, კიდევ ერთი კარგი ამბავი გვაქვს — ჟირაფები თბილისის ახალ ზოოპარკშიც დაიდებენ ბინას. სპეციალურად მათთვის და მათი აფრიკელი მეგობრებისთვის, ახალ ზოოპარკში აფრიკის სავანე გაიხსნება, რომელიც დაახლოებით 10 ჰექტარს დაიკავებს, რაც ძველი ზოოპარკის ტერიტორიაზე ორჯერ დიდია. ამ უზარმაზარ ვოილერში დასახლდება სხვადასხვა სახეობის ანტილოპა, ჰიპოპოტამი, მარტორქა და ზებრები.