Samsung ახალი Note 10-ის წარდგენას 7 აგვისტოს გეგმავს. ამ თარიღის მოახლობასთან ერთად ახალი ფლაგმანის შესახებ ინტერნეტში უფრო და უფრო მეტი ინფორმაცია ჟონავს.

გავრცელებული ინფორმაციით 7 აგვისტოს სამსუნგი Note 10-სა და Note 10 Plus-ს წარადგენს, რომლებსაც, შესაბამისად, 6,3 და 6,8-ინჩიანი ეკრანები ექნებათ. WinFuture-ზე დაყრდნობით, 6,8-ინჩიანი Note 10 Plus 6,3-ინჩიანი ეკრანის მქონე Galaxy Note 9-ის ზომის იქნება, როგორც ცნობილია სამსუნგმა ამას სმარტფონის ჩარჩოების ზომაში შემცირებით მიაღწია.

Note 10 Plus-ს Note 10-სგან განსხვავებით microSD ბარათის მხარდაჭერაც ექნება. აღსანიშნავია, რომ ყურსასმენის 3,5-მილიმეტრიანი ჯეკი არც ერთ მოდელს არ ექნება. სამსუნგი ასევე გეგმავს, რომ დატენვის სისწრაფე მნიშვნელოვნად გააუმჯობესოს. ორივე მოდელს სადენით 45-ვატიანი დატენვის მხარდაჭერა ექნება, სამსუნგის უსადენო დამტენის გამოყენების შემთხვევაში კი მოდელები 20 ვატის სიმძლავრით დაიტენება. ორივე მოდელი, რეგიონის მიხედვით, Snapdragon 855+-ით ან სამსუნგის 7-ნანომეტრიანი Exynos 9825-ით იქნება აღჭურვილი. ორივე სმარტფონს სამი, 12-მეგაპიქსელიანი ფართო, 16-მეგაპიქსელიანი "ულტრაფართო" და 12-მეგაპიქსელიანი ტელეფოტო კამერა ექნება. Note 10 Plus-ს ასევე ექნება ToF სენსორი, რომელიც კამერასა და ობიექტს შორის მანძილს აღიქვამს.

გავრცელებული ინფორმაციით ახალ ფლაგმანებს ფუნქცია Air Gestures დაემატება, რომლის დახმარებითაც სამსუნგის სტილუსით ტელეფონის მართვას ეკრანზე პირდაპირი შეხების გარეშეც შეძლებთ.