ვაკეში, ფალიაშვილის #67-ში ხორცისა და ხორცპროდუქტების მწარმოებელი ქართულ-შვეიცარიული კომპანია ბლაუენშტაინის ახალი მაღაზია გაიხსნა.

ეს ბრენდის მეორე ფილიალია თბილისში, სადაც მომხმარებელს უმაღლესი ხარისხის, შვეიცარიული რეცეპტებითა და ტექნოლოგიით წარმოებული დავარგებული ხორცისა და ხორცპროდუქტების შეძენა შეუძლია.

"ბლაუენშტაინ საქართველოს საქმიანობა გახდა ერთგვარი სტიმული, განგვეხორციელებინა მეცხოველეობის ხელშემწყობი პროგრამები", — აცხადებს ლევან დავითაშვილი.

"ფალიაშვილის ფილიალი ჩვენი მეორე საფირმო მაღაზიაა თბილისის მასშტაბით. პირველი მაღაზია წერეთლის #67-ში მდებარეობს, სადაც ხორცისა და ხორცპროდუქტების ფართო არჩევანია. ასეთივე იქნება ახალი ობიექტიც. აქ მომხმარებელს უმაღლესი ხარისხის პროდუქტი და მომსახურება დახვდება. ჩვენ ვართ საქართველოში ხორცის მწარმოებელი ერთადერთი კომპანია, რომელიც ფერმიდან მომხმარებლის კალათამდე სრულ ჯაჭვს თვითონ აკონტროლებს. ასევე, ვართ ერთადერთი კომპანია დავარგებული ხორცის წარმოების მიმართულებით. ჩვენი პროდუქტი არის 100 პროცენტით ნატურალური და არ შეიცავს ქიმიურ დანამატებსა და კონსერვანტებს, რის გამოც უგემრიელესი და აბსოლუტურად ჯანსაღია", — ამბობს ბლაუენშტაინ საქართველოს დირექტორი თათია არაბიძე.

კომპანია საქართველოში 200-ზე მეტი დასახელების ხორცპროდუქტით არის წარმოდგენილი. რაჭაში მას საკუთარი საქონლის ფერმა და პირველადი დამუშავების საწარმო აქვს, ხორცის საბოლოო დამუშავება კი თბილისში ხდება და საფირმო მაღაზიებს მიეწოდება.

მაღაზიის გახსნას, მომხმარებლებთან ერთად, ესწრებოდნენ საქართველოს გარემოს დაცვისა და სოფლის მეურნეობის მინისტრი ლევან დავითაშვილი, შვეიცარიის ელჩი საქართველოში პატრიკ ფრანცენი, საფრანგეთის ელჩი პასკალ მენიე, ასევე, შვეიცარიის განვითარების ფონდის წარმომადგენლები, პარლამენტის წევრები, რიგითი მოქალაქეები და სხვა საპატიო სტუმრები.

საზეიმო ლენტი ბლაუენშტაინის შვეიცარიელმა დამფუძნებელმა მაქს ბლაუენშტაინმა ლევან დავითაშვილთან ერთად გაჭრა, რის შემდეგაც სტუმრები მაღაზიაში შეიპატიჟა და მათ ხორცის შენახვისა და რეალიზაციის პროცესი პირადად დაათვალიერებინა. გახსნის დღესვე მაქს ბლაუენშტაინი მომხმარებელს საკუთარი ხელით მოემსახურა.

"ეს არის წარმატებული ნაბიჯი ქართულ-შვეიცარიულ თანამშრომლობაში - ბლაუენშტაინი საქმიანობას აფართოებს ჩვენს ქვეყანაში. ეს ძალიან წარმატებული კომპანია მაღალმთიან რეგიონში ეკოლოგიურად სუფთა ხორცს აწარმოებს, რაც ძალიან მნიშვნელოვანია საქართველისთვის. მათი საქმიანობა გახდა ერთგვარი სტიმული, რომ განგვეხორციელებინა მეცხოველეობის ხელშემწყობი პროგრამები. ვიცი, რომ მათი პროდუქტი გამორჩეულია მაღალი ხარისხითა და გემოვნური თვისებებით, მინდა წარმატება ვუსურვო მათ", — განაცხადა ლევან დავითაშვილმა.

კომპანიას ახალი მაღაზიის გახსნა საქართველოში შვეიცარიის ელჩმაც მიულოცა და აღნიშნა, რომ ეს არის ორ ქვეყანას შორის წარმატებული თანამშრომლობის ნათელი მაგალითია.

"ეს არის შესანიშნავი მაგალითი იმისა, როგორ შეუძლია შვეიცარიულ კომპანიას საქართველოს ბაზარზე საქმიანობა და რამდენად სანდოა ქართული ბაზარი. ჩვენ გვაქვს უმაღლესი ხარისხი და სტანდარტი, რომელიც საქართველოში მნიშვნელოვანია და ვფიქრობთ, რომ ჩვენი ქვეყნების თანამშრომლობა მომავალშიც გაგრძელდება", — აღნიშნა პატრიკ ფრანცენმა.

ბლაუენშტაინის ახალი ობიექტის გახსნაზე კომპანიამ თავისი მაღაზია ბორბლებზეც წარმოადგინა, რომელიც სხვადასხვა უბანში ივლის და მომხმარებელს ადგილზე მიაწვდის ხორცსა და ხორცპროდუქტებს.

ეს იდეა მწარმოებელმა მომხმარებლის ინტერესებიდან გამომდინარე განახორციელა, რათა მყიდველებს ქალაქში გადაადგილების პროცესი გაუმარტივოს და საკუთარ უბნებშივე მისცეს შესაძლებლობა, ეკოლოგიურად ჯანსაღი და უმაღლესი ხარისხის პროდუქტი შეიძინოს.

"წერეთელზე არსებულ ფილიალში კომპანიის პროდუქტი სრულად იყიდება, რამაც დაგვანახა, რომ ობიექტისა და ასევე, მოძრავი მაღაზიის დამატება იყო საჭირო, რათა კიდევ უფრო იოლად შეძლოს მომხმარებელმა პროდუქტის შეძენა. ჩვენ თავად ვაწარმოებთ საქონლის უმაღლესი ხარისხის ხორცსა და ხორცპროდუქტებს. ახლა ვაშენებთ ღორის ფერმას რაჭაში, რომელიც თანამედროვე ევროპული სტანდარტებს დანერგავს ამ მიმართულებით. ასევე, მომავალში ვაპირებთ ავაშენოთ რძის გადამამუშავებელი საწარმოც და ნატურალური რძის ყველი შევთავაზოთ ჩვენს მომხმარებელს", — ამბობს „ბლაუენშტაინ საქართველოს“ თანადამფუძნებელი ირაკლი კერვალიშვილი.

აქვე აღვნიშნავთ, რომ ბლაუენშტაინ საქართველო ჩვენს ქვეყანაში დავარგებულ ხორცსა და ხორცპროდუქტებს 2008 წლიდან აწარმოებს. ახალი მაღაზიისთვის კომპანიამ 2-მილიონიანი ინვესტიცია განახორციელა. ჯამში კი, მას საქართველოს ეკონომიკაში 30 მილიონამდე ინვესტიცია აქვს ჩადებული.

კომპანია იყენებს საქონლის უსტრესო დაკვლის მეთოდს, რათა ხორცი ჯანსაღ მდგომარეობაში შენარჩუნდეს. ამის შემდეგ საქონლის კარკასები სპეციალურ მაცივრებში ინახება, სადაც ტემპერატურისა და ტენიანობის მკაცრი კონტროლის შედეგად, ხორცი სისხლისა და მავნე ტოქსინებისგან სრულად იცლება. ამ მდგომარეობაში ხორცი 21 დღის განმავლობაში ყოვნდება, რის შემდეგაც ის საუკეთესო გემოვნურ თვისებებს იღებს. პროდუქტის ტრანსპორტირებას კომპანია მანქანა-მაცივრებით ახორციელებს. მხოლოდ ამ პროცესის გავლის შემდეგ ხვდება პროდუქცია ბლაუენშტაინ საქართველოს საფირმო მაღაზიაში. მნიშვნელოვანია, რომ წარმოების არც ერთ ეტაპზე არ წყდება სიცივის ჯაჭვი, რათა მაღაზიამ, საბოლოოდ კი მომხმარებელმა, უმაღლესი ხარისხის ცოცხალი ხორცი მიიღოს.