პარლამენტის თავმჯდომარე ამბობს, რომ პრეზიდენტ სალომე ზურაბიშვილის დავით გარეჯში ჩასვლა და ამავე საკითხზე მისი განცხადება, ერთი კერძო პირის აქტივობა იყო. ამით ირაკლი კობახიძე პრეზიდენტის პრესსპიკერის 4 ივნისის განცხადებას გამოეხმაურა, რომლის თანახმად, პრემიერ მამუკა ბახტაძესთან შეთანხმებული იყო პრეზიდენტის ნაბიჯები დავით გარეჯზე.

"კერძო აქტივობა იყო, რომელიც, სამწუხაროდ, არ წაადგა მაინც და მაინც ამ საკითხის სწრაფად მოგვარებას. თუმცა, რამდენად ჰქონდათ ამისათვის საბაბი, მეორეა საფუძველი. მე მგონია, რომ ამისათვის საფუძველი არ არსებობდა, საბაბის გამოყენება ყოველთვის შეიძლება. თუმცა, კიდევ ერთხელ გავიმეორებ, მთავარია კონსულტაციების რეჟიმში ხელისუფლებებს შორის ორ სახელმწიფოს შორის გადაწყდეს ეს საკითხი და ზედმეტი ვნებათაღელვა ამას ხელს არ შეუწყობს", — განაცხადა ირაკლი კობახიძემ.

პრეზიდენტმა სალომე ზურაბიშვილმა აზერბაიჯანში ოფიციალური ვიზიტით ყოფნისას აღნიშნა, რომ საქართველო-აზერბაიჯანის ერთობლივი საზღვარი საბოლოოდ უნდა დადგინდეს. აზერბაიჯანიდან ჩამოსვლის შემდეგ ზურაბიშვილმა ამაზე კიდევ რამდენჯერმე ისაუბრა.

ოპოზიციის წევრები ამბობენ, რომ სალომე ზურაბიშვილის განცხადება, სავარაუდოდ, მთავრობასთან შეთანხმებული არ იყო. მათივე თქმით, პრეზიდენტის განცხადების გამო დავით გარეჯის გარშემო არსებული სიტუაცია კიდევ უფრო დაიძაბა.

რა ხდება დავით გარეჯში

დავით გარეჯის უდაბნოს მონასტრამდე მისასვლელი გზა 4-დღიანი ჩაკეტვის შემდეგ გასულ თვეში დროებით გაიხსნა. 23 მაისს ადგილობრივმა, გიდმა ზვიად ანანიაშვილი ფეისბუქზე ფოტოები გაავრცელა, სადაც წერდა, რომ დავით გარეჯში ჩიჩხიტურის მიმართულებით აზერბაიჯანის მხარეს გზა გაჰყავს. ორი დღის შემდეგ საგარეო საქმეთა მინისტრის მოადგილე ლაშა დარსალიამ განაცხადა, რომ აზერბაიჯანული მხარე სამუშაოებს საქართველოს მიერ კონტროლირებად ტერიტორიაზე არ აწარმოებდა.

საქართველო-აზერბაიჯანის საზღვრის დემარკაციასთან დაკავშირებით პირველი შეხვედრა აზერბაიჯანულ მხარესთან 23-24 მაისს გაიმართა. ქართული მხრიდან დელეგაციას ხელმძღვანელობდა საქართველოს საგარეო საქმეთა მინისტრის მოადგილე, საქართველოს სახელმწიფო საზღვრის დელიმიტაციისა და დემარკაციის საკითხებში საქართველოს სპეციალური წარმომადგენელი ლაშა დარსალია, ხოლო აზერბაიჯანის რესპუბლიკის მხრიდან — აზერბაიჯანის რესპუბლიკის საგარეო საქმეთა მინისტრის მოადგილე, აზერბაიჯანის რესპუბლიკის პრეზიდენტის სპეციალური წარმომადგენელი საზღვრისა და კასპიის ზღვის საკითხებში ხალაფ ხალაფოვი.

მხარეები შეთანხმდნენ, რომ ექსპერტებთან შეუთანხმებელი მონაკვეთები ადგილზე ერთად დაათვალიერონ. გარდა ამისა, ისინი აპირებენ, რომ შესაბამისი ნორმატიულ-სამართლებრივი დოკუმენტები და კარტოგრაფიული მასალები შეისწავლონ.