"საიდან მოგაქვთ, რეებს ბოდავთ კაცო", - ასე უპასუხა ვანისა და ბაღდათის მიტროპოლიტმა, მეუფე ანტონმა ჟურნალისტების კითხვას იმის შესახებ, განიხილავენ თუ არა სინოდის სხდომაზე პატრიარქის მოსაყდრის, მეუფე შიოს გადაყენების საკითხს.

მოსაყდრის საკითხზე მეუფეს აღარ უსაუბრია, თუმცა მისი თქმით, შესაძლოა, სხდომაზე განიხილავენ უკრაინის ეკლესიის ავტოკეფალიის საკითხს.

უკრაინის ეკლესიის ავტოკეფალიის საკითხზე ვარაუდი საქართველოში რუსეთის საპატრიარქოს წარმომადგენლის ჩამოსვლამ გამოიწვია. სასულიერო პირი რუსულენოვანი მრევლისთვის იქადაგებს და საჭიროების შემთხვევაში რუსეთის ეკლესიის პოზიციას წარმოადგენს.

არსებობს მოსაზრება, რომ სხდომაზე განიხილავენ ციანიდის და მამა გიორგი მამალაძის საქმესაც. გარდა ამისა, სხდომის ერთ-ერთ საკითხად მიიჩნევა პატრიარქის მოსაყდრის, მეუფე შიოს ლეგიტიმაციის საკითხი და მისი თანამდებობიდან გადაყენება.

სინოდის წევრების თქმით, განხილული საკითხების შესახებ შეხვედრის შემდეგ ისაუბრებენ.