იუმორინა 2017-ის ორგანიზება თბილისის მერიის მუნიციპალიტეტის ააიპ თბილისის კულტურული ღონისძიებების ცენტრმა 59 ათასი ლარით დააფინანსა. ამის შესახებ ინფორმაცია On.ge-ს თბილისის მერიამ მიაწოდა.

როგორც მან წერილში მიუთითა, იუმორინა 2017-ისთვის თანხა თანადაფინანსების ფარგლებში, ხელშეწყობის მიზნით გამოიყო. ხელშეკრულება 2016 წლის 30 ნოემბერს გაფორმდა.

იუმორინა 2017 ფილარმონიის საკონცერტო დარბაზში გაიმართა და ტელეკომპანია იმედის ეთერში გავიდა.

თბილისის მერიამ იუმორინას დაფინანსებისთვის გაწეული ხარჯების შესახებ ინფორმაცია არასრულად და დაგვიანებით გასცა. მერიასთან 16 დეკემბერს მიწერილი წერილით On.ge იუმორინას ორგანიზებისთვის გაფორმებული ხელშეკრულების ასლსაც ითხოვდა. თუმცა, 1 თვის გასვლის შემდეგ მხოლოდ ხელშეკრულების ღირებულების შესახებ მოგვაწოდეს ინფორმაცია.

იუმორინას დაფინანსების შესახებ საჯარო ინფორმაცია On.ge-მ კულტურის სამინისტროდანაც გამოითხოვა. სამინისტროს ინფორმაციით, 2012-2016 წლებში უწყების ცენტრალური აპარატიდან პროექტისათვის თანხა არ გამოყოფილა.