თბილისის სახელმწიფო უნივერსიტეტი კორონავირუსისი გავრცელების საფრთხის გამო 1 აპრილამდე დისტანციური სწავლების რეჟიმზე გადადის. ამის შესახებ ინფორმაციას უნივერსიტეტი ავრცელებს.

"თბილისის სახელმწიფო უნივერსიტეტი, ფაკულტეტებისა და მიმართულებების მზაობიდან გამომდინარე, განახორციელებს დისტანციური სწავლების ელემენტების ინდივიდუალურ პილოტირებას", — აღნიშნულია განცხადებაში.

უნივერსიტეტის ინფორმაციით, ეკონომიკის საერთაშორისო სკოლა (ISET) ელექტრონული სწავლების სინქრონული და ასინქრონული ელემენტების გამოყენებას ( zoom; smartboard; webinar) 16 მარტიდან დაიწყებს.

23 მარტიდან ელექტრონული სწავლების ელემენტებზე გადავა:

  • ზუსტ და საბუნებისმეტყველო მეცნიერებათა ფაკულტეტი;
  • ჰუმანიტარულ მეცნიერებათა ფაკულტეტი;
  • სოციალურ და პოლიტიკურ მეცნიერებათა ფაკულტეტი;
  • ფსიქოლოგიისა და განათლების მეცნიერებათა ფაკულტეტი;
  • ეკონომიკისა და ბიზნესის ფაკულტეტი;
  • მედიცინის ფაკულტეტი;
  • იურიდიული ფაკულტეტი;
  • თსუ პროფესიული განათლების ცენტრი.

უნივერსიტეტი განმარტავს, რომ სტუდენტები რეგისტრაციის გავლას ელექტრონულ სისტემებზე (Moodle, LMS და სხვა) შეძლებენ. სტუდენტებს ფაკულტეტების ადმინისტრაციები მიაწვდიან ინფორმაციას რომელ პლატფორმაზე და როდის იქნება ხელმისაწვდომი ელექტრონული კურსები.

მას შემდეგ, რაც ჯანდაცვის მსოფლიო ორგანიზაციამ COVID-19, იგივე კორონავირუსი, საერთაშორისო პანდემიად გამოაცხადა, საქართველოს მთავრობა მუშაობის საგანგებო რეჟიმზე გადავიდა და ახალი შეზღუდვები და რეკომენდაციები გაავრცელა.

საქართველოში კორონავირუსით ინფიცირების 25 შემთხვევაა დადასტურებული: პირველი 26 თებერვალს დაფიქსირდა, მეორე — 28 თებერვალს, მესამე — 29 თებერვალს, მეოთხე — 5 მარტს დილით, დანარჩენი 5 კი ამავე საღამოს. 7 მარტს კორონავირუსით ინფიცირების კიდევ 4 შემთხვევა დადასტურდა, 9 მარტს — 2 შემთხვევა, 10 მარტს კი — 8. კიდევ 1 შემთხვევა — 11 მარტს, 1 კი — 12 მარტს დადასტურდა.

ასევე, 4 მარტს კორონავირუსი დაუდგინდა იტალიაში მცხოვრებ საქართველოს მოქალაქეს.

წაიკითხეთ NCDC-სა და WHO-ს რეკომენდაციები კორონავირუსის პრევენციის შესახებ:

ამავე თემაზე: