ახლახანს, გავრცელდა 2003 წლის აუდიოჩანაწერი, რომელშიც რეჟისორი კვენტინ ტარანტინო რომან პოლანსკის მიერ 13 წლის გოგოს გაუპატიურებას ამართლებს და ამბობს, რომ გოგოს თავად სურდა ეს.

აუდიუჩანაწერში წამყვანი რეჟისორს კითხვას უსვამს პოლანსკის ამბავზე, რომელმაც 1977 წელს 13 წლის გოგოს ალკოჰოლი მიაღებინა, ნარკოტიკებით გააბრუა და გააუპატიურა.

წამყვანის კითხვას ტარანტინო პასუხობს და ამბობს, რომ პოლანსკის არ გაუუპატიურებია 13 წლის გოგო. უბრალოდ, მას სექსი ჰქონდა არასრულწლოვანთან.

"პოლანსკის სექსი ჰქონდა არასრულწლოვანთან, ეს არაა გაუპატიურება. გაუპატიურება კრიმინალია, პოლანსკის კი კრიმინალთან საერთო არ აქვს. გოგოს თავად სურდა ეს და უფროს კაცს ხვდებოდა", - ამბობს ჩანაწერში ტარანტინო.

როდესაც წამყვანი უმეორებს, რომ გოგო მხოლოდ 13 წლის იყო, ტარანტინო ამბობს, რომ ამ შემთხვევაში ყველა აქცენტს აკეთებს ამერიკელების მორალზე, მაშინ როდესაც მისი აზრით ევროპელებისა და სხვა ქვეყნების მორალში 13 წლის გოგოსთან სექსი ჩვეულებრივი ამბავია, შემდეგ კი გამუდმებით იმეორებს, რომ პოლანსკისთან სექსი გოგოს თავად უნდოდა და რეჟისორს მისთვის არაფერი დაუძალებია.

აღსანიშნავია, რომ პოლანსკი დღემდე ემალება ამერიკის სასამართლოს.

შეგახსენებთ, რომ კვენტინ ტარანტინოს ახალ ფილმში მთავარი აქცენტი სწორედ რომან პოლანსკის პერსონაჟზე გაკეთდება.

გარდა ამისა, რამდენიმე დღის წინ, უმა თურმანმა New York Times-ს ინტერვიუ მისცა, სადაც ის ჰარვი ვაინშტაინს ძალადობაში ადანაშაულებს. მასთან ერთად საუბრობს რეჟისორ კვენტინ ტარანტინოზე და იხსენებ, რომ Kill Bill-ის გადაღებაზე რეჟისორმა კინაღამ მოკლა.

თურმანის ბრალდებებზე ტარანტინომ თქვა, რომ ეს ინციდენტი მისი კარიერისა და ცხოვრების უდიდესი სინანულია.