პრემიერმინისტრ ირაკლი ღარიბაშვილის განცხადებით, უკრაინაში განვითარებული მოვლენების ფონზე არავითარ საჭიროებას არ ხედავს პარლამენტში რიგგარეშე სხდომის ჩატარების. მისი თქმით, უპასუხისმგებლო და მავნებლობაა ოპოზიციის პოლიტიკა და ამას "უსარგებლო ხმაურს" უწოდებს.

"არავითარ საჭიროებას არ ვხედავ [პარლამენტში სხდომის გამართვის], რა თქმა უნდა, არ მივალ. მე მაქვს ჩემი საქმე, პარლამენტს თავისი საქმე აქვს, ომი უკრაინაში მიმდინარეობს და ჩვენ, რა თქმა უნდა, დიდი შეშფოთებით და ყურადღებით ვაკვირდებით იქ განვითარებულ მოვლენებს.

უპასუხისმგებლობა და მავნებლობაა ის პოლიტიკა, ის უსარგებლო ხმაური, რასაც ჩვენი ოპონენტები აკეთებენ. არაფრისმომცემი, პირიქით, ეს ეწინააღმდეგება ჩვენი ქვეყნის ეროვნულ ინტერესებს. მათი ამოცანაა პროვოკაციების მოწყობა და იმ უბედურების განმეორება, რომელიც 2008 წლის აგვისტოს ომში მათ ვერ აირიდეს", — განაცხადა მან.

პრემიერმა ჟურნალისტების კითხვას, აპირებს თუ არა უკრაინაში სოლიდარობისთვის ჩასვლას, უპასუხა, რომ ახლა უკრაინის საჰაერო სივრცე ისედაც ჩაკეტილია.

დღესვე ღარიბაშვილმა განაცხადა, რომ საქართველო რუსეთს ფინანსურ და ეკონომიკურ სანქციებს არ დაუწესებს.

გუშინ, 24 თებერვალს პრეზიდენტმა, სალომე ზურაბიშვილმა განაცხადა, რომ საჭიროდ მიაჩნია ნებისმიერ ფორმატში უკრაინის სუვერენიტეტისა და ტერიტორიული მთლიანობისადმი მხარდაჭერის გამოხატვა და რიგგარეშე სხდომის მოთხოვნას ხელი მოაწერა.

რიგგარეშე სხდომის ჩატარება რუსეთის უკრაინაში შეჭრისა და ომის პარალელურად ოპოზიციამ მოითხოვა. მათი თქმით, ამავე სხდომაზე უკრაინის მხარდამჭერი რეზოლუცია უნდა იქნას მიღებული.


პუტინმა უკრაინაში ომი 24 თებერვალს დაიწყო, რომელსაც თავად სპეციალურ "სამხედრო ოპერაციას" უწოდებს.

იმისთვის, რომ არ გამოგრჩეთ უკრაინაში მიმდინარე პროცესებთან დაკავშირებული სიახლეები, შემოგვიერთდით ჯგუფში — რა ხდება უკრაინაში

გაიგეთ მეტი: