გერმანია დაეხმარება აღმოსავლეთ ევროპის იმ ქვეყნებს (პირველ რიგში, პოლონეთს), რომლებიც რუსეთის მიერ უკრაინაზე შეტევის შედეგად ლტოლვილების დიდი ნაკადის შემოსვლას ელიან.

ამის შესახებ გერმანიის შინაგან საქმეთა მინისტრმა, ნენსი ფეზერმა განაცხადა.

"ჩვენ შევთავაზებთ მასიურ დახმარებას იმ ქვეყნებს, განსაკუთრებით ჩვენს მეზობელ პოლონეთს, რომლებზეც ლტოლვილების გადაადგილება იქონიებს გავლენას" — განაცხადა ფეზერმა და იქვე დასძინა, რომ მას აქტიური მოლაპარაკებები აქვს პოლონეთის მთავრობასთან და ევროკომისიასთან.

გერმანულ მედიაში წერენ, რომ უკრაინაში მიმდინარე ომის გამო ევროკავშირის ქვეყნებს დაახლოებით 200 000-დან ერთ მილიონამდე ლტოლვილი შეაფარებს თავს.

ბერლინის მერის განცხადებით, უკვე ემზადებიან, რომ საჭიროების შემთხვევაში ლტოლვილები გერმანიის დედაქალაქშიც მიიღონ.


პუტინმა უკრაინაში ომი დაიწყო, რომელსაც თავად სპეციალურ "სამხედრო ოპერაციას" უწოდებს და მიზეზად ოკუპირებული დონეცკისა და ლუგანსკის სეპარატისტი ლიდერების "დახმარების თხოვნას" ასახელებს. ის ამტკიცებს, თითქოს ეს "ოპერაცია" არის თავდაცვა მათგან, ვინც "უკრაინა ტყვედ აიყვანა". ტრადიციულ პროპაგანდისტულ მოტივებზე პუტინი იმეორებს, რომ არ აპირებს უკრაინის ოკუპაციას და უკრაინელი ხალხის თვითგამორკვევის უფლებას უჭერს მხარს.

უკრაინის შინაგან საქმეთა მინისტრის მრჩეველის, ანტონ გონჩარენკოს განცხადებით, განხორციელდა სარაკეტო დარტყმები სამხედრო ადმინისტრაციის ცენტრებზე, აეროდრომებზე, სამხედრო საცავებზე, კიევთან, ხარკოვთან, დნეპერთან. მისივე თქმით, ხდება საზღვრის საარტილერიო დაბომბვა.

უკრაინის საგარეო საქმეთა მინისტრი, დმიტრი კულება აცხადებს, რომ რუსეთმა მათ წიანააღმდეგ სრულმასშტაბიანი ომი დაიწყო და მშვიდობიან ქალაქები იბომბება. მისი თქმით, უკრაინა თავს დაიცავს და მსოფლიომ პუტინი ახლავე უნდა შეაჩეროს.

უკრაინის პრეზიდენტმა, ვოლოდიმირ ზელენსკიმ სამხედრო მდგომარეობა გამოაცხადა. მან მოუწოდა ხალხს, არ აყვნენ პანიკას. მისი თქმით, ყველაფრისთვის მზად არიან და ყველას დაამარცხებენ.

ამავე თემაზე:

გაიგეთ მეტი: