თამაშების ინდუსტრია ერთ-ერთი ყველაზე სწრაფად მზარდი სფეროა, რომელიც მუდმივად ახალ ტექნოლოგიებს ერგება და მომხმარებელს ახალ, დაუვიწყარ თავგადასავლებს უმზადებს.

ვიდეოთამაში იდეიდან მომხმარებლამდე გრძელ ჯაჭვს გადის, რომლის შეუფერხებლად მუშაობას სფეროს გამორჩეული პროფესიონალები უზრუნველყოფენ. სწორედ ამიტომ, ეს კონკურენტული სფეროა, რომელშიც გამორჩეული იდეებისა და უნარების ადამიანებზე მაღალი მოთხოვნაა.

კონკურენცია, ცოდნის გაზიარება და გამოცდილება საქმის უკეთ კეთებაში გვეხმარება, ამიტომ ისეთი ჰაკათონის არსებობა, როგორიც Global Game Jam-ია განსაკუთრებულ მნიშვნელობას იძენს. მსოფლიოში ყველაზე დიდ მობილური თამაშების შექმნის ღონისძიებას წელს საქართველოც შეუერთდა. 28-30 იანვარს, ბილაინის მხარდაჭერით 48-საათიანი ჰაკათონი გაიმართა. ასეთივე ღონისძიება, პარალელურ რეჟიმში, მსოფლიოს 100-ზე მეტ ქვეყანაში 600-ზე მეტ ლოკაციაზე ჩატარდა და ათასობით კონკურსანტი გააერთიანა. ჰაკათონის მიზანი ინოვაციური იდეების დანერგვის ხელშეწყობა და მონაწილეების დახმარება იყო, რათა ახალი უნარები აღმოეჩინათ და საინტერესო კონტაქტები დაემყარებინათ.

ფოტო: ბილაინი

ფოტო: ბილაინი

ჰაკათონში 50-მდე ადამიანი მონაწილეობდა, რომლებმაც 2 დღის განმავლობაში თამაშების შექმნაზე იმუშავეს, მენტორებისგან რჩევები მიიღეს, საკუთარი პროდუქტი დახვეწეს და ამასთან, თამაშების ინდუსტრიაში არსებული სიახლეებისა და გამოცდილებების შესახებ ლექციებსა და სემინარებსაც დაესწრნენ.

Parallax - გაიცანით ჰაკათონის გამარჯვებული გუნდი

ფოტო: ბილაინი

Global Game Jam საქართველოს დასასრულს კი მონაწილე გუნდებმა გლობალურ და ლოკალურ თემებზე შექმნილი თამაშები ჟიურის 8 წევრს წარუდგინეს. კონკურსანტებს ღონისძიების პარტნიორებისგან სხვადასხვა საჩუქრები გადაეცათ. გამარჯვებული გუნდი parallax გახდა, რომელმაც მთავარი პრიზი — 5000 ლარი და გლობალურ კონკურსში ჩართვის შესაძლებლობა მიიღო.

გუნდის წევრები გრაფიკული დიზაინერი და მენეჯერი, გიორგი ჭყრუნიშვილი, ანიმატორი, ლაშა სამხარაძე, დეველოპერები, გოგიტა შამათავა და აჩი გუგუჩია იყვნენ.

გიორგის თქმით, ჰაკათონში მონაწილეობაზე ბევრი არ უფიქრიათ, რადგან გამოცდილების მიღებისა და საინტერესო ადამიანების გაცნობის კარგ შესაძლებლობად მიიჩნიეს.

„დაახლოებით 1 კვირით ადრე გავიგეთ გლობალური გეიმჯემის შესახებ და მსგავსი ღონისძიების შესახებ გაგება გაგვიხარდა. მართალი გითხრათ, კარგ ღონისძიებას და საინტერესო გუნდებს ველოდით, მაგრამ იმაზე მაგარი პროექტები ვნახეთ, ვიდრე წარმოგვედგინა. ჩვენი მთავარი მიზანი გამოცდილების მიღება და საინტერესო ადამიანებთან კომუნიკაცია იყო“, — აღნიშნა გიორგიმ.

გიორგი მათ მიერ შექმნილი თამაშის იდეაზეც გვესაუბრა და აგვიხსნა, რომ სიუჟეტი ერთ-ერთ ბნელ პლანეტაზე ვითარდება, მისია კი მისი განათებაა.

„ჩვენი თამაშის იდეა ასეთია: გალაქტიკაში უამრავი უსიცოცხლო და ბნელი პლანეტაა, მზეზე კი ბევრი ნათურა ცხოვრობს და ანათებს. თამაშისას ერთი რიგითი ნათურა ხარ, რომელსაც ჩაბნელებულ პლანეტაზე აგზავნიან. შენი მიზანია, მიხვიდე პლანეტის ცენტრში და გაანათო ის. გარდა ამისა, მეგობარი ნათურების დახსნაც უნდა შეძლო, ისე გამოიყენო თამაშის ბერკეტები (სინათლის ანთება და ჩაქრობა, დამალვა, ასევე პატარა განათებებით მოწინააღმდეგის მოტყუება), რომ მოწინააღმდეგე მონსტრებმა ვერ დაგამარცხონ“, — გვიხსნის გიორგი და ამბობს, რომ მათი გამარჯვების მიზეზი სწორად არჩეული ტაქტიკა იყო — „გეიმჯემის დაწყებისთანავე გადავწყვიტეთ, რომ 48 საათში მოგვემზადებინა თამაში, რომელსაც ასე თუ ისე დასრულებული სახე ექნებოდა და კარგი დემო ვერსიაც ხელმისაწვდომი იქნებოდა, რამაც რეალურად დიდ კონკურენციაში გაგვამარჯვებინა“.

გიორგიმ აღნიშნა, რომ Global Game Jam-ის 48 საათი მისთვის დასამახსოვრებელი იყო და იმედი გამოთქვა, რომ ჰაკათონში მონაწილეობას სამომავლოდაც შეძლებს.

ინიციატივა, რომელიც თამაშების ინდუსტრიის განვითარებას ხელს შეუწყობს

Global Game Jam Georgia-ს ორგანიზატორის, ჰაიკ ასრიანცის თქმით, მსგავსი პროექტები სამომავლოდაც გაგრძელდება, რადგან ღონისძიებამ დიდი დაინტერესება გამოიწვია და მაღალი ხარისხის პროდუქტიც შეიქმნა.

"ჩვენი მიზანია, შევქმნათ ისეთი სივრცე, სადაც მონაწილეებს მიეცემათ საკუთარი კრეატიულობის გამოვლენის საშუალება და თავადაც მიიღებენ თამაშის შექმნის პროცესით სიამოვნებას. ამასთან, ინდუსტრიის განვითარებაშიც შეიტანენ წვლილს. ღონისძიებამ დიდი დაინტერესება გამოიწვია და ორი დღის განმავლობაში მაღალი ხარისხის პროექტები შეიქმნა. სწორედ ამიტომ, ჩვენ აუცილებლად გავაგრძელებთ მსგავს პროექტებზე მუშაობას", — აღნიშნა ჰაიკ ასრიანცმა, Startup Bü ro-ს თანადამფუძნებელმა და Global Game Jam Georgia-ს ორგანიზატორმა.

საქართველოში თამაშების ინდუსტრიის კიდევ უფრო განვითარებისთვის კერძო სექტორის ჩართულობა განსაკუთრებით მნიშვნელოვანია. Global Game Jam-ის ჩატარება შრომატევადი საქმეა, თუმცა მსგავსი ინიციატივების სასიკეთო გავლენა ამად ნამდვილად ღირს. ჰაკათონი ნიჭიერ ახალგაზრდებს ახალ შესაძლებლობებს უხსნის, გამოცდილების მიღებაში ეხმარება და სამომავლოდ მნიშვნელოვანი კონტაქტების დამყარებაშიც ხელს უწყობს, რაც ქართული თამაშების ინდუსტრიას მსოფლიო სტანდარტებთან კიდევ უფრო აახლოებს.

ბილაინი კორპორაციული სოციალური პასუხისმგებლობის ფარგლებში, Global Game Jam საქართველოს მხარდამჭერი გახდა და ახალი ცოდნისა და გამოცდილების მიღების კიდევ ერთ შესაძლებლობას უწყობს ხელს.