სახელმწიფო ინსპექტორი ლონდა თოლორაია აცხადებს, რომ მმართველ პარტიას სამსახურის გაუქმების შესახებ მათთან არანაირი კომუნიკაცია არ ჰქონია. მისი თქმით, ქართულ ოცნებაში ისე გადაწყვიტეს უწყების დაშლა და ორი სხვადასხვა სამსახურად გარდაქმნა, რომ არ უკითხავთ მათთვის, როგორ მუშაობდნენ აქამდე.

"ეცადათ ჩვენთან კონსულტაცია, იქნე ლონდა თოლორაიასთვისაც მისაღები იყო რაღაც ფორმით ამ სამსახურის დახვეწა? ამ ტიპის კონსულტაციებზეც კი არავინ ღირსად არ ჩათვალა არც სახელმწიფო ინსპექტორი და არც მისი არცერთი თანამშრომელი, რომ ჩვენთან კონსულტაცია გაევლო. არ დაუსვამთ არცერთი კითხვა, როგორ თანაარსებობდა ეს ორი ფუნქცია ერთად, ერთი უწყების ქუდის ქვეშ — იქნებ კარგი იყო, ან იქნებ რაიმე გამოწვევები იყო.

2021 წელს მე არაერთხელ მქონდა კოორდინაცია საქართველოს პარლამენტთან, რომ იქნებ მოისმინოთ ჩვენი ანგარიში, რომელიც არის საკმაოდ, მე ვფიქრობ, შინაარსიანი, საკმაოდ კრიტიკული. სამწუხაროდ, პარლამენტმა ვერ გამონახა დრო იმისთვის, რომ მოესმინა მის წინაშე ანგარიშვალდებული ახლადჩამოყალიბებული უწყების ხელმძღვანელისათვის", — განაცხადა ლონდა თოლორაიამ მთავარი არხის ეთერში.

ის ფიქრობს, რომ პარლამენტის მიერ მათი ანგარიშის მოსმენაზე მოსმენის გაჭიანურება, პერსონალურ მონაცემთა კანონის მიღების გაჭიანურება და სხვა ფაქტორები იყო "ირიბი სიგნალი" იმისკენ, რაც საბოლოოდ სამსახურის გაუქმების დაანონსებით დაგვირგვინდა. კითხვას, იყო თუ არა მინიშნებები პირდაპირი, თოლორაიამ ასე უპასუხა:

"არა, პირადი საუბრები ამასთან დაკავშირებით არ ყოფილა. მე ვთვლი, რომ ალბათ მქონდა ის ავტორიტეტი, რომ ამაზე ჩემთან პირდაპირი საუბარი ვერ გაებედა ვერავის [...]

სხვადასხვა ტიპის სიგნალები მიგვიღია ამასთან დაკავშირებით, რომ ცოტა შეგვეცვალა კურსი ჩვენი საქმიანობის, თუმცა ვერც ერთმა ამ ირიბმა მინიშნებამ ვერანაირი შედეგი ვერ გამოიღო და ბოლოს ეტყობა ეს [სამსახურის გაუქმება] იყო ყველაზე კარგი გამოსავალი", — ამბობს თოლორაია.

ჯერ კიდევ მოქმედი სახელმწიფო ინსპექტორი იმედოვნებს, რომ აღნიშნული კანონპროექტი კანონად არ გადაიქცევა.


ქართულ ოცნებას სახელმწიფო ინსპექტორის სამსახურის გაუქმება და მის ბაზაზე ორი ახალი უწყების — სპეციალური საგამოძიებო სამსახურისა და პერსონალურ მონაცემთა დაცვის სამსახურის შექმნა სურს. შესაბამისი კანონპროექტი უკვე მომზადებული და ინიცირებულია.

აღსანიშნავია, რომ პერსონალურ მონაცემთა დაცვის სამსახური აქამდეც არსებობდა. სწორედ მისი გაუქმების შემდეგ, 2019 წლიდან ამოქმედდა სახელმწიფო ინსპექტორის სამსახური და სხვა ფუნქციებიც შეითავსა.

ლონდა თოლორაიამ სპეციალურად გამართულ ბრიფინგზე მმართველი პარტიის დეპუტატების მიერ ინიცირებული კანონპროექტი დამოუკიდებელი სამსახურის "დასჯად" შეაფასა.