პარლამენტმა მესამე მოსმენით დაამტკიცა კანონპროექტი, რომლითაც აზარტული თამაშების ბიზნესის წარმომადგენლებს ახალი რეგულაციები უწესდებათ. კანონპროექტი ითვალისწინებს როგორც ონლაინ, ასევე ფიზიკურ სივრცეში სათამაშო ბიზნესის რეკლამირების აკრძალვას, ასევე, აზარტულ და მომგებიან თამაშებში მონაწილეობისთვის ასაკობრივი ზღვრის 25 წლამდე გაზრდას.

კანონის მიხედვით მედიაში აზარტული თამაშების რეკლამის განთავსება აიკრძალება. გადაწყვეტილებას მედიამენეჯერების პროტესტი მოყვა და მედიის წინააღმდეგ გადადგმულ ნაბიჯად შეფასდა. მედიაკოლაცია საკანონმდებლო პაკეტის დაჩქარებული წესით განხილვას უარყოფითად აფასებს. ორგანიზაციაში აცხადებენ, რომ განმარტებით ბარათში მოყვანილი არგუმენტები პრობლემური და არასაკმარისია. მათივე განცხადებით, არსებობს რისკი, რომ საკანონმდებლო ცვლილება მაუწყებლებს ფინანსურად მნიშვნელოვნად დააზარალებს.

ქართული ოცნების წევრებმა თქვეს, რომ თარიღი გადაიწევს და რეკლამის განთავსება მედიაში მარტიდან აიკრძალება. მათივე მტკიცებით, გადაწყვეტილება მედიის წარმომადგენლების თხოვნით მიიღეს.

აზარტული თამაშების შეზღუდვის ინიციატივა პრემიერმინისტრის ეკუთვნის. 29 ნოემბერს ირაკლი ღარიბაშვილმა განაცხადა, რომ კაზინოებში ვერ ითამაშებენ სოციალურად დაუცველი პირები, რომლებიც დახმარებას იღებენ სახელმწიფოსგან და საჯარო მოხელეები. მისივე თქმით, ონლაინ სათამაშო ბიზნესისთვის გათვალისწინებული იქნება ახალი საგადასახადო დაბეგვრის მექანიზმის შემოღება და ჯამურად სექტორის გადასახადების დასაბეგრი ბაზა 65-70%-ით გაიზრდება.

მაშინ პრემიერმინისტრმა დააანონსა სათამაშო ბიზნესის ყველანაირი რეკლამის აკრძალვაც. მათ შორის, სატელევიზიო, გარე და ქართულ ვებ-გვერდებზე განთავსებული რეკლამა. ღარიბაშვილის თქმით, სათამაშო ბიზნესოპერატორებისთვის დასაშვები იქნება მხოლოდ სპონსორობის ხელშეკრულების გაფორმება.

ინიციატივას სათამაშო ბიზნესის მხრიდან პროტესტი მოყვა. 15 დეკემბერს, დარგობრივი ეკონომიკისა და ეკონომიკური პოლიტიკის კომიტეტის თავმჯდომარემ, დავით სონღულაშვილმა ამ კანონპროექტის განხილვისას ბიზნესის წარმომადგენლებს განუცხადა, რომ მოუწევთ იმ მოცემულობაზე გადაწყობა, რასაც სახელმწიფო სთავაზობთ. მისი თქმით, კანონპროექტის განხილვის შესახებ მიღებული გადაწყვეტილება პოლიტიკურია და არა ეკონომიკური, რადგან საზოგადოების ინტერესიდან გამომდინარეობს და ლუდომანიის პრობლემას ეხება.

სათამაშო ბიზნესის ასოციაციის განცხადებით, იმ შემთხვევაში, თუ მთავრობა არ წავა ბიზნესთან კონსტრუქციულ დიალოგზე, ისინი იძულებული გახდებიან გათიშონ ონლაინ ტოტალიზატორები და უარი თქვან სოციალურ და სხვა პროექტებზე, მათ შორის სპონსორობაზე. ასოციაციის ხელმძღვანელის თქმით, მოთამაშეთა მინიმალური ასაკის 25 წლამდე გაზრდით იზღუდება ადამიანის საკუთრების უფლება, რაც კონსტიტუციითაა გარანტირებული.

სათამაშო ბიზნესის ასოციაცია მიიჩნევს, რომ დაანონსებული ცვლილებები გამოიწვევს მომხმარებლების გადინებას უცხოურ, არალიცენზირებულ ვებ-გვერდებზე, სადაც ასაკობრივი ზღვარი 18 წელია და არ მოქმედებს რეგისტრაციის მაღალი სტანდარტები. ეს კი ფაქტობრივად გამორიცხავს მათი უფლებების დაცვის კონტროლს სახელმწიფოს მხრიდან.