ცნობილი ადამიანები, იშვიათი გამონაკლისების გარდა, ყოველთვის ცდილობენ, ჟურნალისტების კეთილგანწყობა მოიპოვონ, რადგან მათი "იმიჯის" შექმნა დიდწილად სწორედ მედიაზეა დამოკიდებული. თუმცა, იშვიათ გამონაკლისებში შედის რიდლი სკოტი, რომელმაც, ერთი შეხედვით, უწყინარი შედარების გამო, ინტერვიუერი გალანძღა.

84 წლის რეჟისორს თავის ბოლო ნამუშევარზე, The Last Duel-ზე, ეკითხებოდნენ, როცა ინტერვიუერმა სასხვათაშორისოდ აღნიშნა, ეს ფილმი თქვენს წინა ნამუშევრებზე "უფრო რეალისტურიაო".

ოსკარის სამგზის ნომინანტმა სკოტმა კი, არც აცია, არც აცხელა, უწმაწური ფრაზით უპასუხა.

"ძალიან რეალისტური ფილმია", — ასე შეაფასა ინტერვიუერმა The Last Duel, — "უფრო რეალისტური, ვიდრე ზეციური სამეფოა, ან რობინ ჰუდი, მაგალითად..."

"სერ, შეგე*ით. შეგე*ით. დიდი მადლობა. შეგე*ით. გაა*ვით, სერ. მიდით".

სკოტის გაღიზიანება, შეიძლება, ისტორიული მხატვრული ფილმების შეფასების ინდიკატორად "სიზუსტისა" და "რეალისტურობის" მოყვანამ გამოიწვია.

The Last Duel-ის გარდა, წელს რიდლი სკოტის კიდევ ერთი ფილმი, House of Gucci გამოვიდა, რომლის პრემიერაც არცთუ დიდი ხნის წინ შედგა.

ინტერვიუში სკოტმა მილენიალები The Last Duel-ის ფინანსურ წარუმატებლობაშიც დაადანაშაულა. პროექტმა $70 მილიონზე მეტით იზარალა.

"დღეს ჩვენ გვყავს აუდიტორია, რომელიც ტელეფონებზე გაიზარდა", — აცხადებს სკოტი ერთ-ერთ პოდკასტში, — "მილენიალები, რომელთაც არაფრის სწავლა არ უნდათ, თუ ამას ტელეფონზე არ ეტყვი".

თუმცა, სკოტი დასძენს, რომ თავის კარიერაში შექმნილ არცერთ ფილმზე მუშაობას არ ნანობს.

"ყოველთვის ვერ მოიგებ", — აღნიშნავს რეჟისორი, — "დიდი ხანია, ვისწავლე, რომ საკუთარი თავის კრიტიკოსი თავადვე უნდა იყო. ერთადერთი რაზეც საკუთარი აზრი მართლა უნდა გქონდეს, შენივე ნამუშევარია. უბრალოდ, გაიარე. მთავარია, ბედნიერი იყო და უკან არ მოიხედო. ასეთი ვარ მე".

ფოტო: GETTY IMAGES

ცოტა ხნის წინ სკოტმა აგრეთვე გააკრიტიკა გუჩის ოჯახი, რომელიც House of Gucci-ში მონაწილე მსახიობებზე პრეტენზიას გამოთქვამდა.

"რასაც ოჯახიდან გადასაღებ მოედანზე გვწერდნენ, შემაშფოთებლად შეურაცხყმყოფელი იყო", — დასძენს რეჟისორი, — "ამბობდნენ, რომ ალ პაჩინო ალდო გუჩის ფიზიკურად ვერ განასახიერებს. და მაინც, ალ პაჩინოზე უკეთ ვინ განასახიერებდა მათ? უკაცრავად! მგონი, მსოფლიოში თქვენი როლის საუკეთესოდ შემსრულებელი მსახიობები გყავთ, ძალიან გაგიმართლათ".