მთავრობა სოციალურად დაუცველების დასაქმებას გეგმავს. ამის შესახებ საკოორდინაციო საბჭოს დასრულების შემდეგ ეკონომიკის მინისტრმა, ნათია თურნავამ ისაუბრა. მინისტრის თქმით, მთავრობის მიერ შემუშავებული რეფორმა სიღარიბის დაძლევასა და დასაქმების პარამეტრების გაუმჯობესებას გამოიწვევს.

"საკმაოდ მასშტაბური რეფორმა იწყება, რომელიც შეეხება სოციალურად დაუცველების აქტიურ შრომაში ჩართვას. რესოციალიზაცია იმ ადამიანებისთვის, რომლებიც წლების განმავლობაში არიან მინდობილი სოციალურ დახმარებას, არადა შესწევს უნარი, რომ ღირსეულად ჩადგეს სამსახურში და თავისი შრომით ჰქონდეს შემოსავალი.

ეს ახალი პროგრამა, რა თქმა უნდა, გამოიწვევს სიღარიბის დაძლევას და შრომისუნარიანი მოსახლეობის დასაქმებას და დასაქმების პარამეტრების გაუმჯობესებას. ღირსეული შრომა მხოლოდ სოციალური დახმარების ნაცვლად", — განაცხადა თურნავამ.

მინისტრის თქმით, ჯანდაცვის სამინისტრო მუშაობს იმ ადამიანების რაოდენობის დადგენისთვის, რომლებიც სოციალურ დახმარებას იღებენ, თუმცა შეუძლიათ და სურთ მუშაობის დაწყება. თურნავას განცხადებით, ასეთი პირების რიცხვი დაახლოებით 200 000-ია.

"ერთის მხრივ, მეტი და მეტი პროგრამა გვაქვს, სადაც ადამიანები უნდა დასაქმდნენ და შესაძლებელია დასაქმდნენ. ეს არ საჭიროებს განსაკუთრებულ უნარებს ამ ეტაპზე. მეორეს მხრივ, გვყავს არმია, დაახლოებით, 200 000 ადამიანი, ვინც არის სტატუსით სოციალურად დაუცველი, მაგრამ შეუძლია და სურვილიც აქვს, რომ ჩაერთოს შრომით საქმიანობაში", — განაცხადა ნათია თურნავამ.

სოციალური დაუცველების დასაქმების შესახებ ინიციატივა პირველად პრემიერმინისტრმა გააჟღერა. ირაკლი ღარიბაშვილმა თქვა, რომ ქვეყნის 300 000 შრომისუნარიანი მოქალაქე სოციალური დახმარების მძევალია. ღარიბაშვილმა ისიც თქვა, რომ ამ პრობლემის მოსაგვარებლად ადამიანები მუშაობას უნდა მიაჩვიონ და შრომის კულტურა განავითარონ.


ოქტომბერში სოციალური შემწეობა 633 586 ადამიანმა მიიღო, რაც საქართველოსთვის რეკორდულად მაღალი მაჩვენებელია. სოციალური მომსახურების სააგენტოს ინფორმაციით, სოციალურ დახმარებას საქართველოს მოსახლეობის 17% იღებს.

სოციალური შემწეობის მიმღებთა რაოდენობა ბოლო ერთ წელში 24%-ით, ანუ 123 243 ადამიანით არის გაზრდილი. როგორც სტატისტიკაშია აღნიშნული, ოქტომბერში დახმარება საქართველოში მცხოვრებმა 171 724-მა ოჯახმა მიიღო.