ქართველმა მთარგმნელმა, აღმოსავლეთმცოდნემ და პოეტმა, გიორგი ლობჟანიძემ, ირანის ისლამური რესპუბლიკის ერთ-ერთი უმაღლესი საერთაშორისო ჯილდო, შაჰრიარის სამეცნიერო და კულტურული მედალი მიიღო. ინფორმაციას ამის შესახებ თბილისის სახელმწიფო უნივერსიტეტი ავრცელებს, სადაც ლობჟანიძე ასოცირებული პროფესორია.

შაჰრიარის მედალს თავრიზის სახელმწიფო უნივერსიტეტის სამეცნიერო საბჭო რეგიონისა და მსოფლიოს იმ მკვლევრებისთვის გასცემს, ვისაც ირანისტიკის განვითარებაში განსაკუთრებული წვლილი აქვს შეტანილი. ლობჟანიძეს ჯილდო ჯალალ ედ-დინ რუმის არსთა მესნევის ქართული თარგმანისა და კომენტარების შესრულებისთვის გადაეცა.

ფოტო: Iran Medeniyyet merkezi / Facebook

ეპიდსიტუაციის გათვალისწინებით, დაჯილდოება ონლაინ რეჟიმში გაიმართა 17 ნოემბერს. ღონისძიებაზე, რომელსაც სხვადასხვა ქვეყნიდან ამავე ჯილდოზე წარდგენილი კიდევ ექვსი მეცნიერი ესწრებოდა, გიორგი ლობჟანიძემ მადლობა გადაუხადა საქართველოში ირანის ისლამური რესპუბლიკის საელჩოს კულტურის წარმომადგენლობას ჯილდოზე წარდგენისთვის. ასევე, ირანის ისლამური რესპუბლიკის მთავრობასა და თავრიზის უნივერსიტეტს — მედლის მინიჭებისათვის.

"ჩემამდე შაჰრიარის მედალი საქართველოდან რამდენიმე ძალიან ღირსეულმა ადამიანმა მიიღო უკვე და მიხარია, რომ დღეს მათ რიგებს მეც შევუერთდი", — აღნიშნა ლობჟანიძემ, — "საერთოდ მიმაჩნია, რომ ეს მედალი მხოლოდ ჩემი კი არა, მთელი ქართული ირანისტიკისაა, განსაკუთრებით, ჩემი დიდი მასწავლებლებისა, რომელთაგან ზოგი დღეს უკვე ცოცხალი აღარ არის, მაგრამ მთელი თავიანთი ცხოვრება შესწირეს ირანისტიკას. ივანე ჯავახიშვილის თბილისის სახელმწიფო უნივერსიტეტში, რომელიც არა მარტო საქართველოში, არამედ მთელ კავკასიაში უძველესი უნივერსიტეტია და 1918 წელს არის დაარსებული, მისი დაარსების დღიდანვე ისწავლება სპარსული ენა და ლიტერატურა. ეს ტრადიცია დღეს უკვე ირანისტიკის განყოფილებაზე გრძელდება. მადლობას ვუხდი თავრიზის უნივერსიტეტს და მნიშვნელოვანია, რომ ეს მედალი ჯალალ ედ-დინ რუმის არსთა მესნევისათვის მენიჭება. სხვათა შორის, რომ არა თავრიზიდან მონაბერი მადლი (შამსე თავრიზი), ჯალალ ედ-დინ რუმიც ვერასოდეს იქნებოდა ის რუმი, ვისაც მთელი მსოფლიო იცნობს და აფასებს".

ქართველმა მთარგმნელმა ასევე ხაზი გაუსვა მსგავსი ჯილდოებისა და თანამშრომლობის მნიშვნელობას რეგიონის ქვეყნებს შორის სამეცნიერო კავშირების გაღრმავებისათვის.

ლობჟანიძის გადაცემული მედალი სპარსულ ლიტერატურაში გამორჩეული პოეტის, შაჰრიარის სახელს ატარებს, რომელიც ასევე თავრიზიდან იყო. დაჯილდოება წელს მეექვსედ გაიმართა.

აღსანიშნავია, რომ აქამდე, სხვადასხვა წელს, ეს ჯილდო მიღებული აქვთ სხვა ქართველ ირანისტებს: თსუ ირანისტიკის მიმართულების ხელმძღვანელს, თეა შურღაიას, პროფესორ ნომადი ბართაიასა და დოქტორ მაია სახოკიას.