ტელეკომპანია იმედის დაკვეთით ჩატარებული ეგზიტპოლის შედეგების მიხედვით, 4 დიდ ქალაქში მმართველი გუნდის კანდიდატები იგებენ. შედეგები ასე გადანაწილდა:

თბილისი

  • კახა კალაძე — 57,2%
  • ნიკა მელია — 42,8%

ქუთაისი

  • იოსებ ხახალეიშვილი — 51,9%
  • ხატია დეკანოიძე — 48,1%

რუსთავი

  • ნინო ლაცაბიძე — 53,8%
  • დავით კირკიტაძე — 46,2%

ბათუმი

  • არჩილ ჩიქოვანი — 50,8%
  • გიორგი კირთაძე — 49,2%

განსხვავებული შედეგებია მთავარი არხის ჩატარებულ ეგზიტპოლში — ხსენებული 4 ქალაქის გარდა, მათ აქვთ ზუგდიდის შედეგებიც და ხუთივე ქალაქში ნაციონალური მოძრაობის კანდიდატები იგებენ.

ტელეკომპანია იმედის განცხადებით, მათი დაკვეთით, საზოგადოებრივი კვლევის ცენტრმა გორბიმ ეგზიტპოლი 4 ქალაქში — თბილისში, ქუთაისში, რუსთავსა და ბათუმში 150 შემთხვევით შერჩეულ საარჩევნო უბანზე ჩაატარა. მათვე თქმით, თბილისში შეირჩა 75 საარჩევნო უბანი, დანარჩენ ქალაქებში კი — თითოეულში 25 უბანი.

როგორც იმედზე ამბობენ, გამოკითხული რესპონდენტები შეირჩნენ წინასწარ განსაზღვრული მეთოდოლოგიით და ინტერვალით, რათა დაცული ყოფილიყო საარჩევნო უბნებზე მისულ ამომრჩეველთა რეპრეზენტატულობა. მათივე ინფორმაციით, ცდომილების ზღვარი, ყველა ქალაქში, 95%-იანი საიმედობისას შეადგენს +/- 2.5%-ს. 18:00 საათის მონაცემებით, გამოკითხულია 17 ათასზე მეტი ამომრჩეველი.

არჩევნების ამეორე ტური 15 თვითმმართველ თემსა და 5 თვითმმართველ ქალაქში, მათ შორის, თბილისში გაიმართა. ასევე, 24 საარჩევნო ოლქში, რომლის შედეგად აირჩევა 42 მაჟორიტარი. მერობისა და მაჟორიტარობისთვის ჯამში 9 პარტიის, ასევე, ორი დამოუკიდებელი კანდიდატი იბრძვის.

დღის განმავლობაში გავრცელდა არაერთი ინფორმაცია დარღვევების, მათ შორის, ამომრჩეველზე ზეწოლისა და სავარაუდო მოსყიდვის შესახებ. ასევე, მოხდა დაპირისპირებები საარჩევნო უბნებთან. კოორდინატორები და აგიტატორები თავს დაესხნენ და ფიზიკური შეურაცხყოფა მიაყენეს ჟურნალისტებსაც.