გირჩი — მეტი თავისუფლების ლიდერის, ზურაბ ჯაფარიძის განცხადებით, ექიმების კონსილიუმისა და სახალხო დამცველის დასკვნები მიუთითებს იმაზე, რომ ექსპრეზიდენტ მიხეილ სააკაშვილს სიკვდილისთვის წირავენ.

"არსებობს ექიმების საკოორდინაციო საბჭო, რომელმაც თქვა, რომ ამ ადამიანს [მიხეილ სააკაშვილს] შეიძლება დასჭირდეს სპეციფიური ტიპის სამედიცინო დახმარება და ამ სამედიცინო დახმარებისთვის საჭიროა სპეციალური სადიაგნოსტიკო აპარატი, ერთი მხრივ, და მეორე მხრივ, სპეციალური კვალიფიკაციის ექიმები. ამის შემდეგ სახალხო დამცველი წავიდა ციხის საავადმყოფოში, შეამოწმა, დაბრუნდა და თქვა, რომ ამ საკოორდინაციო საბჭომ რაც თქვა, კვალიფიკაციის სამედიცინო პერსონალი იქ არ არისო, ისევე როგორც არ არისო ის აპარატი, რომელიც შეიძლება დასჭირდეს ამ ადამიანს, ასევე არ არისო. რაც ნიშნავს იმას, რომ სიკვდილისთვის წირავენ", — აცხადებს ჯაფარიძე TV პირველთან.

ჯაფარიძე ამბობს, რომ ხელისუფლების საქციელის შეფასებაზე სერიოზული კომენტარის გაკეთება შეუძლებელია. მისი შეფასებით, ხელისუფლების ქმედებები მხოლოდ "არაადამიანური პოლიტიკური შურისძიების მოტივით აიხსნება".

"ახსნა, მოტივი რა შეიძლება იყოს ამისი, პოლიტიკური შურისძიების გარდა, პოლიტიკური არაადამიური შურისძიების გარდა, ჩემთვის არ არსებობს. ეს ხომ არ არის რაღაცა პატარა ბავშვის გაჯიუტება. საუბარია, ქვეყნის პრეზიდენტის სიცოცხლეზე. ნორმალურები არ არიან, შეუძლებელია, ასეთ არაადამიანურ საქციელს სერიოზული კომენტარი გაუკეთო, არ არიან ეგენი ნორმალურები", — აღნიშნავს ის.


მიხეილ სააკაშვილი პირველ ოქტობერს, მას შემდეგ დააკავეს, რაც სოციალურ ქსელში ვიდეო გაავრცელა, სადაც ჩანდა, რომ საქართველოში იმყოფებოდა. ის 26 დღეა შიმშილობს.

ექსპრეზიდენტის ექიმი და ადვოკატები მის სათანადოდ აღჭურვილ სამოქალაქო კლინიკაში გადაყვანას ითხოვენ. მათი თქმით, პენიტენციური სამსახურის მე-18 სამედიცინო დაწესებულება არ არის აღჭურვილი იმ აპარატურით, რაც საჭიროა მიხეილ სააკაშვილის ჯანმრთელობის მონიტორინგისა და მკურნალობისთვის.

მისი პირადი ექიმის, ნიკოლოზ ყიფშიძის განცხადებით, სააკაშვილი გლდანის ციხეში მკურნალობის კატეგორიულად წინააღმდეგია. ექიმის ცნობით, კონსილიუმი თანხმდება, რომ საჭიროების შემთხვევაში, ექსპრეზიდენტი მრავალპროფილურ, მაღალი კლასის კლინიკაში უნდა გადაიყვანონ.

სახალხო დამცველიც მიიჩნევს, რომ ციხის საავადმყოფო სრულად არ შეესაბამება ექიმთა კონსილიუმის რეკომენდაციებს და ამასთან, არსებობს რისკები ექსპრეზიდენტის უსაფრთხოებაზეც.

ჯანდაცვის მინისტრის, ეკატერინე ტიკარაძის მტკიცებით, მიუხედავად იმისა, რომ მე-18 სამედიცინო დაწესებულებას არ აქვს გადაუდებელი მიღების შესაძლებლობა, ის სრულადაა აღჭურვილი იმისთვის, რომ საჭიროების შემთხვევაში, მიხეილ სააკაშვილი მიიღოს. იგივე პოზიცია აქვს იუსტიციის სამინისტროსაც.

პრემიერმინისტრი ირაკლი ღარიბაშვილი კი ამტკიცებს, რომ სააკაშვილს აქვს "ილუზიები", თითქოს კერძო კლინიკაში გადაყვანის შემთხვევაში, 30 ოქტომბერს მისი მხარდამჭერები მობილიზდებიან და გაათავისუფლებენ. რაც შეეხება სააკაშვილის კერძო საავადმყოფოში გადაყვანას, ღარიბაშვილი აცხადებს, რომ ციხის საავადმყოფოში ყველა პირობა არის შექმნილი და ეს გადაწყვეტილება "არ გადაიხედება".