ქართული ოცნების აღმასრულებელი მდივანი, მამუკა მდინარაძე აცხადებს, რომ მათ თვითმმართველობის მეორე ტურის წინასაარჩევნო პერიოდში "საკმაოდ ნეგატიური" კამპანია წამოიწყეს, რათა თუ ვინმეს პოლიტიკურ მეხსიერებასთან დაკავშირებული პრობლემები აქვს წარსული გაახსენონ. მისი თქმით, ნაციონალურ მოძრაობასთან წაგება შეუძლებელია და სწორედ ამიტომ არიან "დიდ გულზე" და "შეტევაზე".

"პირველ ტურში კახა კალაძემ ჩამოაყალიბა ყველა დეტალთან დაკავშირებით თავის მოსაზრება, რომელსაც არავინ არც აკრიტიკებდა, არ შედიოდნენ თემაში, იმიტომ რომ არ აწყობთ ამ თემებში შესვლა, მაგრამ ახლა ამას ჩვენ დავამატეთ საკმაოდ ნეგატიური, მოდი ვთქვათ და ვაღიაროთ, კამპანია, რომ თუ ვინმეს კიდევ რაღაცა მეხსიერებასთან დაკავშირებით შეიძლება პრობლემა გაუჩნდეს, პოლიტიკურ მეხსიერებასთან ამ შემთხვევაში, შეურაცხყოფას არავის არ ვაყენებ, არც მათ ყველაზე გულანთებულ მომხრეს, რა თქმა უნდა, მასაც უნდა შევახსენოთ ეს ხალხი ვინ არის და როგორ ალაგებენ გაღმა შედავების პრინციპს", — განაცხადა მდინარაძემ იმედის ეთერში.


არჩევნებამდე 2 კვირით ადრე მმართველმა გუნდმა ექსპრეზიდენტ მიხეილ სააკაშვილისა და ნაციონალური მოძრაობის დისკრედიტაციის მიზნით ვიდეო გამოაქვეყნა. მათ ოფიციალურ, ვერიფიცირებულ ფეისბუქგვერდზე ატვირთულ ვიდეორგოლში გამოყენებულია ის კადრები, რომლებსაც სხვადასხვა დროს ტროლ-გვერდები ენმ-ის დისკრედიტაციისთვის იყენებდნენ. ქართულმა ოცნებამ ამ კლიპს დავასრულოთ ნაცები დაარქვა და და #ნაცობასირხვილია დააჰეშთეგა.

ვიდეო იმ ეპიზოდებით იწყება, რომელიც არაერთხელ უხსენებია დამამცირებელ კონტექსტში პრემიერმინისტრ ირაკლი ღარიბაშვილს და აგვისტოს ომის დროს სააკაშვილისა და მისი დაცვის ქცევას ასახავს. გარდა ამისა, გვხვდება სხვა კადრები, რომელთა მიზანი სააკაშვილის დაცინვა და დამცირებაა — უმეტესი დრო ექსპრეზიდენტს ეთმობა, თუმცა აქვე არის ეპიზოდები გიგი უგულავას, დავით კირტიკაძისა და ნიკა მელიას შესახებ. ვიდეოს ბოლოში წითელ ფონზე ჩნდება წარწერა: დავამთავროთ ნაცები.

ამასთანავე, რაიონებში წინასაარჩევნო შეხვედრებზე ოპოზიციის მადისკრედიტირებელ განცხადებებს აკეთებენ პრემიერმინისტრი ირაკლი ღარიბაშვილი და ქართული ოცნების თავმჯდომარე ირაკლი კობახიძე.

გაიგე მეტი: