20 ოქტომბერს წლის ერთ-ერთი უმნიშვნელოვანესი ლიტერატურული ღონისძიება, ფრანკფურტის წიგნის საერთაშორისო ბაზრობა დაიწყო. გერმანიის ლიტერატურული დედაქალაქიდან რამდენიმე მნიშვნელოვანი სიახლე უკვე შევიტყვეთ, მათ შორის ისიც, რომ ქართველი მწერლის, ნინო ხარატიშვილის ახალ და ჯერ გამოუცემელ რომანზე უფლებები ერთ-ერთ უდიდეს ამერიკულ გამომცემლობას, HarperCollins-ს და კიდევ ცხრა ქვეყნის გამომცემლებს შეუძენიათ.

თუმცა, ოქტომბრის გრილ ამინდებში საინტერესო ამბები არც საქართველოში მყოფ წიგნების მოყვარულებს მოაკლდებათ. წელს თბილისი, როგორც იცით, წიგნის მსოფლიო დედაქალაქია, რომლის ფარგლებშიც არაერთი საინტერესო პროექტი უკვე განხორციელდა და კიდევ ბევრი იგეგმება. მაგრამ ამჯერად ალბათ ყველანაირი ინტერესის მქონე მკითხველზე მორგებული ღონისძიება, თბილისის VI საერთაშორისო ლიტერატურული ფესტივალი, იმართება.

ფესტივალი 17 ოქტომბერს გაიხსნა. მას შემდეგ გაიმართა ბევრი საინტერესო შეხვედრა უცხოელ და ქართველ ლიტერატორებთან. მათ შორის, საქართველოსა და უკრაინის პენცენტრების ერთობლივი დისკუსია "ლიტერატურა ოკუპაციის პირისპირ", დისკუსია თემაზე "მწერლობა ომისა და დიქტატურის პირობებში" ბელარუს, ისრაელელ და უკრაინელ ავტორებთან ერთად, ასევე ქართველი მწერლების სემინარების ციკლი საერთო კონცეფციით "ქალაქი, როგორც სიმბოლო". შეხვედრის ვიდეოჩანაწერების ნახვა პროექტის ფეისბუქგვერდზე შეგიძლიათ.

თუმცა, თუკი ამ შეხვედრებზე დასწრება ან ლაივ-რეჟიმში თვალის მიდევნება ვერ მოახერხეთ, არ დაღონდეთ, წინ კიდევ ბევრი საინტერესო ამბავი გველოდება.

პარასკევი

მაგალითად, 22 ოქტომბერს, 19 საათზე, დისკუსია "მწერალი რამდენიმე ენის სივრცეში" ხუთი სხვადასხვა ქვეყნის ავტორებს გააერთიანებს: ჰაიკე ფიდლერი შვეიცარიიდან, ტარიკ ელ-ტაიბი სუდანი/ავსტრიიდან, ორელია ლასაკი საფრანგეთიდან და ზურაბ ქარუმიძე საქართველოდან. შეხვედრის მოდერატორი ინგა ჟღენტი იქნება.

თანამედროვე ლიბანელი მწერალი, იმან ჰუმაიდან იუნისი, თავისი წიგნების მთარგმნელთან, დარეჯან გარდავაძესთან ერთად.

ფოტო: გამომცემლობა ინტელექტი

ამავე დღეს, 20:30-ზე გაიმართება შეხვედრა ლიბანელ მწერალთან, იმან ჰუმაიდანთან, რომელსაც მთარგმნელი გიორგი ლობჟანიძე გაუძღვება.

შაბათი

არანაკლებ ამაღელვებელი ღონისძიებები იგეგმება ამ შაბათ-კვირას.

23 ოქტომბერს, 17 საათზე, ამერიკელი რედაქტორი ჟაკლინ ბენ-ზეკრი, სულაკაურის გამომცემლობის დირექტორი თინა მამულაშვილი და მთარგმნელი ხათუნა ცხადაძე ლიტერატურულ პროცესებში მხატვრული რედაქტორის როლზე იმსჯელებენ.

თინა მამულაშვილი საბას 2018 წლის დაჯილდოებაზე.

ფოტო: საბა

ხათუნა ცხადაძე საბას 2017 წლის დაჯილდოებაზე.

ფოტო: პირველი არხი / YouTube

18 საათზე პოეზიის მოყვარული მკითხველი ფრანგი ორელია ლასაკი მოსმენას შეძლებს.

მოგვიანებით, 20 საათზე კი ღონისძიების ალბათ ერთ-ერთი ყველაზე საინტერესო ამბავია დაგეგმილი. ცნობილი ამერიკელი მწერალი და მსოფლიო ბესტსელერის, ბნელი მატერიის, ავტორი ბლეიკ კრაუჩი მკითხველს შეხვდება. შეხვედრას ზაზა კოშკაძე და ლუკა გრიგოლია უხელმძღვანელებენ.

კვირა

24 ოქტომბერს ფესტივალი კვლავაც კრაუჩის შეხვედრებით გაგრძელდება. 15 საათზე, იგი ჟაკლინ ბენ-ზეკრისთან ერთად მწერლებისა და სტუდენტებისთვის შემოქმედებითი წერის სემინარს ჩაატარებს. მასზე დასასწრებად საჭიროა რეგისტრაციის, ერთგვარი შესარჩევი ტურის, გავლა.

ამერიკელი მწერალი, ბლეიკ კრაუჩი

ფოტო: Sarah Tew / CNET

18 საათზე კრაუჩი უკვე იმან ჰუმაიდანთან გააგრძელებს მწერლის შინაგან იზოლაციასა და იძულებით იზოლაციას შორის განსხვავებაზე საუბარს.

19 საათზე კიდევ ერთი ბესტსელერის, მოკვდი, სიყვარულო, არგენტინელ ავტორთან, არიანა ჰარვიცთან შეხვედრა გაიმართება, რომლის მოდერატორიც ირაკლი მენთეშაშვილი იქნება.

დაბოლოს, 20:30-ზე, წელს გარდაცვლილი ამერიკელი პოეტის, ლორენს ფერლინგეტისადმი მიძღვნილი საღამო დაიწყება, სახელწოდებით "ქალაქის უქრობი შუქები".


როგორც ხედავთ, წინ მნიშვნელოვანი და საინტერესო ლიტერატურული ამბებით დახუნძლული უქმეებია. ღონისძიებების შესახებ დეტალური ინფორმაციის მიღებას თბილისი — წიგნის მსოფლიო დედაქალაქის ფეისბუქგვერდზე და თბილისის საერთაშორისო ლიტერატურული ფესტივალის ვებსაიტზე შეძლებთ.