სწრაფი კვების რესტორნების უმსხვილესი ქსელი McDonald's ამერიკის შეერთებულ შტატებში მდებარე ფილიალებში მცენარეული "ხორცისგან" დამზადებული ბურგერის შეტანას გეგმავს. ეს საკვები ქალაქ ლოს ანჯელესში დაფუძნებულ კომპანია Beyond Meat-თან თანამშრომლობითაა შექმნილი.

როგორც ცნობილია, ახალ პროდუქტს McPlant ერქმევა, McDonald's-ის საფირმო ბურგერისთვის დამახასიათებელი გემო ექნება და ვიზუალურადაც მას დაემგვანება. ჯერჯერობით გაურკვეველია, ვიხილავთ თუ არა მას აშშ-ის გარეთ.

კონკურენტების, Burger King-ისა და KFC-ის მსგავსად, McDonald's საკუთარი მენიუს გამრავალფეროვნებას ცდილობს და სურს, მომხმარებლებს ხორცის შემცვლელი მცენარეული საკვები შესთავაზოს. აღსანიშნავია, რომ მან ამგვარი, საცდელი ბურგერის გაყიდვა პირველად 2019 წელს, ევროპასა და კანადაში დაიწყო.

ასევე, იხილეთ: მალე აშშ-ის მაღაზიებში მცენარეული "ქათმის" ჩხირები გაიყიდება

McPlant-იც სწრაფი კვების გიგანტის ზემოხსენებული გეგმის ნაწილია. ის ბარდას, ბრინჯს, კარტოფილს, სეზამის მარცვლებიან ფუნთუშებს, პომიდორს, სალათის ფოთოლს, დამარინადებულ კიტრს, ხახვს, მაიონეზს, კეტჩუპს, მდოგვსა და ამერიკულ ყველს შეიცავს.

McDonald's-მა ეს პროდუქტი შვედეთში, დანიაში, ნიდერლანდებში, დიდ ბრიტანეთსა და ავსტრიაში უკვე გამოცადა. 3 ნოემბრიდან კი მას აშშ-შიც დააგემოვნებენ. McPlant ქვეყნის მასშტაბით 8 რესტორანში გამოჩნდება. აღნიშნული ფილიალები ტექსასის, კალიფორნიისა და ლუიზიანის შტატების სხვადასხვა ქალაქშია განლაგებული.