პარტია საქართველოსთვის ლიდერის, გიორგი გახარია აცხადებს, რომ მიხეილ სააკაშვილი სამართლებრივად პოლიტპატიმარი არ არის. ის, ასევე, ამბობს, რომ, სააკაშვილი კონკრეტული, მძიმე დანაშაულების გამო არის მსჯავრდებული და არის იქ, სადაც უნდა იყოს. მისივე თქმით, ის, რომ მმართველი პარტია სააკაშვილს პოლიტიკური მიზნებისთვის იყენებს, ეს იმას არ ნიშნავს, რომ მას დანაშაული არ ჩაუდენია.

"მე მას არ ვუწოდებ პოლიტიკურ პატიმარს. ადამიანმა, რომელმაც შექმნა სისტემური ძალადობრივი მოწყობა ქვეყანაში, ამას არავინ უარყოფს, ამის შემდეგ, როდესაც ამას ადამიანი შეცდომას უწოდებს და არა — დანაშაულს, წლების განმავლობაში არ ეყო ვაჟკაცობა, არც გონიერება და არც პოლიტიკური პრაგმატიზმი, რომ ამისთვის დანაშაული დაეძახათ.

სამართლებრივად ის არ არის პოლიტპატიმარი და ის კონკრეტული, მძიმე დანაშაულების გამო არის მსჯავრდებული და არის იქ, სადაც უნდა იყოს. [...] სანამ დანაშაულის აღიარება არ იქნება — აღიარებას შეიძლება მოჰყვეს მონანიება — სანამ არ იქნება აღიარება, მონანიება ან სასჯელის მოხსნა, რა თქმა უნდა, პატიებაზე ნებისმიერი პრეტენზია უადგილოა და ეს თითოეულმა საქართველოს მოქალაქემ ძალიან კარგად იცის", — განაცხადა გახარიამ TV პირველის ეთერში.


მიხეილ სააკაშვილი 15 დღეა შიმშილობს. 10 ოქტომბერს, მისმა პირადმა, ექიმმა ნიკოლოზ ყიფშიძემ თქვა, რომ ექსპრეზიდენტის მდგომარეობა დამძიმდა. როგორც ექიმი განმარტავს, ეს შიმშილობის გამო მოხდა და მას უჭირს საუბარი და მოძრაობა. პასუხად პენიტენციური სამსახური ამტკიცებს, რომ ეს ინფორმაცია სიმართლეს არ შეესაბამება. მათი თქმით, როგორც მოშიმშილე, სააკაშვილი მუდმივად იმყოფება სამედიცინო პერსონალის დაკვირვების ქვეშ და მდგომარეობა დამაკმაყოფილებელია.

მომდევნო დღეს სააკაშვილის ადვოკატმა, ნიკა გვარამიამ განაცხადა, რომ ექსპრეზიდენტის ჯანმრთელობის მდგომარეობა დამაკმაყოფილებელია და ამ საკითხებით უტრირება არ ღირს.

გარდა ამისა, 8 ოქტომბერს პენიტენციულმა სამსახურმა გაავრცელა ინფორმაცია, რომ სააკაშვილმა ციხის მაღაზიაში 7 ქილა თაფლი შეიძინა და დაწყებული აქვს საკვების მიღება. ამას უპასუხა სააკაშვილის ექიმმა და თქვა, რომ თაფლს მხოლოდ ერთ კოვზს იღებდა და ჩაიში აგდებდა. მისივე თქმით, ამ ინფორმაციაზე სპეკულაციების შემდეგ სააკაშვილმა თაფლის მიღებაც შეწყვიტა.

ამავე თემაზე: