ევროპარლამენტარი ანა ფოტიგამ განაცხადა, რომ საქართველოს ყოფილი პრეზიდენტი, მიხეილ სააკაშვილი პატიმრობიდან დაუყონებლივ უნდა გათავისუფლდეს. ევროპარლამენტარის თქმით, მას სააკაშვილის მიმართ წაყენებული ბრალდებების არ სჯერა.

"მე არ მჯერა იმ ბრალდებების, რომლის მიხედვითაც მას თავის ქვეყანაში დესტაბილიზაცია სურს, პირიქით, ის ყოველთვის ფრთხილი იყო, როდესაც საქმე მისი ქვეყნის კეთილდღეობასა და მშვიდ ცხოვრებას ეხებოდა. მას საქართველოში დაბრუნების ძალიან რთული გადაწყვეტილება მიიღო, მე დიდი ხნის წინ მქონდა ეჭვი, რომ ის ამას გააკეთებდა, ჩემი მოსაზრება არ შეცვლილა, მისმა მმართველობამ საქართველო სრულიად სხვა დონეზე აიყვანა [მთავარი არხის თარგმანი]", — განაცხადა ანა ფოტიგამ.

ამასთან, ანა ფოტიგა პრემიერმინისტრის, ირაკლი ღარიბაშვილის მიერ გაკეთებულ განცხადებას, სადაც ის სააკაშვილს "წესიერად" მოქცევისკენ მოუწოდებს, წინააღმდეგ შემთხვევაში კი მუხლების დამატებით ემუქრება, "უკიდურესად პოლიტიკურსა" და ნაჩქარევს უწოდებს.

"პირველ რიგში, ჩემი აზრით, პრემიერმინისტრის სიტყვებიც, რომელიც მან ყოფილ პრეზიდენტს, მიხეილ სააკაშვილის დაკავებისთანავე წარმოქმნა, უკიდურესად პოლიტიკური ხასიათის იყო. მან ჯერ საქებარი სიტყვები არ დაიშურა ოლიგარქ ბიძინა ივანიშვილის საქმიანობის მიმართ და შემდეგ იმავე დროს გამოთქვა თავისი მოსაზრებები იმ თემებზე, რომელზეც სასამართლოს გადაწყვეტილება ჯერჯერობით მიღებული არ აქვს. ეს, მე ვიტყოდი, ნაჩქარევი ქმედება იყო [მთავარი არხის თარგმანი]", — ამბობს ევროპარლამენტარი.

მიხეილ სააკაშვილი პირველ ოქტომებრს დააკავეს. მანამდე, ექსპრეზიდენტი აქტიურად აცხადებდა, რომ გეგმავდა საქართველოში დაბრუნებას. 27 სექტემბერს მან თვითმფრინავის ბილეთი გაავრცელა გაავრცელა, რომლის მიხედვითაც 2 ოქტომბერს, თვითმმართველობის არჩევნების დღეს უნდა ჩამოფრენილიყო. პირველი ოქტომბრის დილით, სააკაშვილმა ფეისბუქგვერდზე პოსტი გამოაქვეყნა, რომელმაც შექმნა ვარაუდი, რომ შესაძლოა, ის უკვე საქართველოში ყოფილიყო. ამასთან, მან გაავრცელა ორი ვიდეო, სადაც ამბობდა, რომ ბათუმში იყო ფონად კი ქალაქის ხედი ჩანდა.

პირველ ოქტომბერს, მთელი დღის განმავლობაში, ქართული ოცნების წევრები აცხადებდნენ, რომ სააკაშვილს საზღვარი არ გადმოუკვეთავს და მისი ვიდეო არაავთენტური იყო. საზღვრის გადმოკვეთა უარყო შინაგან საქმეთა სამინისტრომაც. დღის ბოლოს, პრემიერმინისტრმა, ირაკლი ღარიბაშვილმა განაცხადა, რომ ექსპრეზიდენტი დაკავებულია და გადაყვანილია პენიტენციურ დაწესებულებაში. მას არ დაუკონკრეტებია სად დააკავეს ის და გადმოკვეთილი ჰქონდა თუ არა საზღვარი.

ექსპრეზიდენტის დაკავებიდან მალევე, ნაციონალური მოძრაობის წევრებმა გაავრცელეს ინფრორმაცია, რომ ის საქართველოში ოთხი დღის განმავლობაში იმყოფებოდა. ქართული ოცნების წევრებმა კი დაიწყეს მტკიცება, რომ ინფორმაცია ყველაფრის შესახებ ჰქონდათ, მაგრამ გამოძიების ინტერესებიდან გამომდინარე სიმართლეს არ ამხელდნენ. ღარიბაშვილმა განაცხადა, რომ ყველაფერი წინასწარ იცოდნენ და "ოპერატიული ტაქტიკის" გამო უწევდათ საპირისპირო განცხადებების გაკეთება. მან ბოდიშიც კი მოუხადა თანაგუდელებს იმის გამო, რომ სიმართლეს ვერ ამბობდნენ. 4 ოქტომბერს პროკურატამ ინფორმაცია გაავრცელა, რომ სააკაშვილი საქართველოში 29 სეტემბერს შემოვიდა.