ტელეკომპანია ფორმულას დირექტორის, ზუკა გუმბარიძის განცხადებით, ფორმულას დამფუძნებლისა და თავდაცვის ყოფილი მინისტრის, დავით კეზერაშილის წინააღმდეგ შეტანილი სარჩელი მათ ტელევიზიას უკავშირდება და მედიის წინააღმდეგ არსებული კამპანიის ნაწილია.

"როგორც ჩანს, ეს ქმედებები უკვე რაღაც ფინალურ ფაზაში შედის. მე მინდა, გაგახსენოთ ყველას, რომ ორშაბათს ფორმულას ეთერში გავიდა Edison Research-ის კვლევები, სადაც დაინახა მაყურებელმა, რომ ხელისუფლება ვერ ახერხებს 43%-იანი ბარიერის გადალახვას და სწორედ ეს გახდა მთავარი განმაპირობებელი მიზეზი იმისა, რომ ასეთი დაჩქარებული ტემპით ხელისუფლებას მიეტანა ახალი შეტევა ფორმულაზე და მის დამფუძნებელზე. ჩვენ უკვე გვქონდა კომუნიკაცია Edison Research-თან და რა სცენარითაც არ უნდა განვითარდეს მოვლენები — დღეს ან ხვალ ამ კომპანიაში დაინიშნოს დროებითი მმართველი ან მოხდეს რაიმე სხვა ტიპის ღონისძიება, რომელიც ხელს შეუშლის ეგზიტპოლების გამოქვეყნებას, ეს ეგზიტპოლები მაინც გავა რომელიმე ქართული არხის ეთერში", — განაცხადა მან.

მან მოუწოდა ამერიკის შეერთებული შტატების საელჩოს, რომ გაატარონ ყველანაირი პრევენციული ზომა იმისთვის, რომ არ მოხდეს ზეწოლა ამ ეგზიტპოლის ჩამტარებელ კომპანიაზე. ამასთან, გუმბარიძის განცხადებით, ეგზიტპოლების გარდა, ეს ყველაფერი უკავშირდება არჩევნების შემდეგ სცენარების განხილვას. მისივე თქმით, ბოლო პერიოდში ხელისუფლების მთავარ სამიზნეს "კრიტიკული მედიები და მათი გაჩუმება" წარმოადგენს. მან ასევე, აღნიშნა, რომ პარალელურად მიმდინარეობს მთავარი არხის დამფუძნებლის, ნიკა გვარამიასა და TV პირველის დირექტორის, ვატო წერეთლის მამის საქმეც.

"ჩვენ ვიცით, რომ გარდა ამ ქეისისა, ფაქტობრივად, ბოლოში არის გასული ნიკა გვარამიას ქეისი, დაჩქარებული ტემპებით ბოლო კვირაში მიმდინარეობდა ვატო წერეთლის მამის წინააღმდეგ სასამართლო პროცესები, რაც აჩენს ბუნებრივ ეჭვს, რომ თუ არჩევნებზე ხელისუფლებისთვის არ დადგება სასურველი შედეგი, ისინი განიხილავენ სცენარს იმისა, რომ ერთდროულად მოხდეს სამივე ამ კრიტიკული მედიის მაუწყებლობის შეფერხება ან გაჩერება და ამისთვის ისინი გამოიყენებენ ე.წ. სამართლებრივ ბერკეტებს. სინამდვილეში საქმე გვაქვს იმასთან, რომ ხელისუფლება განიხილავს სცენარს იმისა, თუ როგორ შეიძლება წავიდეს ეს ქვეყანა რუსული ტიპის მმართველობისკენ, როგორ დაემშვიდობოს დემოკრატიას", — აღნიშნა გუმბარიძემ.

საქართველოს თავდაცვის სამინისტრომ ყოფილი თავდაცვის მინისტრის, დავით კეზერაშვილისა და მისი თანამდებობაზე ყოფნის დროს სახელმწიფო შესყიდვების დეპარტამენტის უფროსის, ალექსანდრე ნინუას წინააღმდეგ საქალაქო სასამართლოში სარჩელი შეიტანა. სამინისტროს განცხადებით, ისინი თავდაცვის უწყების მიმართ "დანაშაულებრივი ქმედებით მიყენებული ზიანის" ანაზღაურებას ითხოვენ.

7 სექტემბერს უზენაესმა სასამართლომ ყოფილ მაღალჩინოსანსა და ტელეკომპანია ფორმულას დამფუძნებელს, დავით კეზერაშვილს 5-წლიანი პატიმრობა მიუსაჯა. ადვოკატის ინფორმაციით, თავდაცვის ყოფილ მინისტრის, დავით კეზერაშვილს პროკურატურა საწვრთნელ პროექტში 5 მილიონზე მეტი თანხის გაფლანგვას ედავებოდა, თუმცა, მას ბრალი ვერ დაუმტკიცდა ვერც საქალაქო და ვერც სააპელაციო სასამართლოში.

გაიგე მეტი: