BBC-ის ცნობით, ავღანეთის დედაქალაქ ქაბულის მერმა, ჰამდულა ჰომეინმა მუნიციპალიტეტში დასაქმებულ ქალებს სახლში დარჩენისკენ მოუწოდა მანამ, სანამ მათ სამუშაო ადგილს კაცები არ შეავსებენ. მისი თქმით, თალიბანმა საჭიროდ მიიჩნია, რომ ქალებმა გარკვეული ხნით მუშაობა შეწყვიტონ.

ქაბულის მერის განცხადებით, ქალაქში დასაქმებულთა მესამედი ქალები არიან. მისივე თქმით, ზოგიერთი მათგანი მუშაობის გაგრძელებას შეძლებს, მაგალითად, სამუშაოს შეინარჩუნებენ ისინი, ვინც ქალთა საპირფარეშოებში მუშაობდნენ, სადაც კაცებს შესვლა არ შეუძლიათ, პოზიციებზე კი, რომლის დაკავებაც კაცებს შეძლებენ, ქალები მუშაობას ვეღარ მოახერხებენ.

შეზღუდვას დედაქალაქში კვირას, 19 სექტემბერს მცირე საპროტესტო აქცია მოჰყვა, ქალთა ნაწილმა კი მათი უფლებების მოთხოვნით პრესკონფერენცია გამართა.

თალიბანი, რომელიც ავღანეთს 1996-2001 წლებში მართავდა, განსაკუთრებით სასტიკი იყო ქალების მიმართ. მათ აკრძალული ჰქონდათ განათლების მიღება, მუშაობა, გარეთ კაცის გარეშე გასვლა ან საჯაროდ ისეთი ტანსაცმლით სიარული, რომელშიც სხეულის რომელიმე ნაწილი ან სახე დაფარული არ ექნებოდათ. არასრულწლოვანი გოგოების დიდ ნაწილს მათზე ბევრად უფროს კაცებზე აქორწინებდნენ და ნებისმიერი წესის დარღვევის შემთხვევაში, სასტიკად, წამებით ან სიკვდილით სჯიდნენ. არსებული წესები 2001 წელს შეიცვალა, როდესაც აშშ-მ თალიბანის ძალაუფლება დაამხო. დღეს ყველაფერი ისევ შეიცვალა.

ავღანეთზე კონტროლის ხელში აღების შემდეგ, თალიბანის პრესსპიკერმა მედიასთან პირველ პრესკონფერენციაზე ქალთა უფლებებზე ისაუბრა. მან ამ საკითხს "ძალიან მნიშვნელოვანი" უწოდა და თქვა, რომ მხარს უჭერენ ქალთა უფლებებს, თუმცა მხოლოდ შარიათის კანონის ფარგლებში. მას შემდეგ კი, რაც თალიბებმა ავღანეთი დაიკავეს, არაერთმა ავღანელმა ქალმა საჯაროდ ისაუბრა საკუთარი შიშებისა და მოლოდინების შესახებ.

გაიგეთ მეტი: