ლელოს ლიდერის, ბადრი ჯაფარიძის განცხადებით, გავრცელებული ფაილების ავთენტურობის დადგენისთანავე უნდა გადადგნენ, როგორც სახელმწიფო უსაფრთხოების სამსახურის, ასევე, მთავრობის ხელმძღვანელები. ამის შესახებ მან ჟურნალისტებთან ისაუბრა.

"დამოუკიდებელი მართლმსაჯულების პირობებში, რა თქმა უნდა, ეს უკვე კარგა ხნის გამოძიებული იქნებოდა. რა თქმა უნდა, ფაილების ავთენტურობის დადგენისთანავე უნდა გადადგეს სუს-ს უფროსი და მთავრობის ხელმძღვანელი. მე მინდა შეგახსენოთ, რომ აშშ-ს პრეზიდენტი გადადგა, როდესაც უკანონო მოსმენები იქნა დადგენილი, შესაბამისად, როდესაც უკანონო მოსმენები ხორციელდება ქვეყანაში ამაზე პასუხისმგებლობა უნდა აიღოს მთავრობის ხელმძღვანელმა. ასე ხდება დემოკრატიულ სახელმწიფოებში და რა თქმა უნდა, იმ კონკრეტული სამსახურის უფროსმა, რომლის მეშვეობითაც ხორციელდებოდა ეს უკანონო მოსმენები და მიყურადება", — განაცხადა მან.


13 სექტემბერს ცნობილი გახდა, რომ ერთ-ერთი ღია წყაროზე სასულიერო პირებთან დაკავშირებით მასალები აიტვირთა. უცნობია, ვინ გაავრცელა ფაილები და ასევე, არ არის დადასტურებული მათი ავთენტურობა. თუმცა რამდენიმე პოლიტიკოსმა და ჟურნალისტმა, მათ შორის On.ge-ს ყოფილმა რედაქტორმა განაცხადეს, რომ ჩანაწერებში საკუთარი საუბრები ამოიცნეს.

ჩანაწერების მიხედვით, უსმენენ და უთვალთვალებენ ელჩებსა და საელჩოების თანამშრომლებსაც. ფაილებში დაარქივებულია ევროკავშირის ელჩისა და მისი თანამშრომლის საუბარი. თავდაპირველად, ელჩი თანამშრომელს პროტოპრესვიტერ გიორგი ზვიადაძის ნომერს სთხოვს, შემდეგ კი მიმდინარე საკითხებზე თავის პოზიციას აფიქსირებს.

დოკუმენტებში არის ინფორმაცია ამერიკის საელჩოს წარმომადგენლების შესახებაც. მაგალითად, მითითებულია, რომ ელჩის თანაშემწეს დაუკავშირდა USAID-ის წარმომადგენელი და კონკრეტული შეხვედრის მონაწილეების შესახებ ინფორმაცია დააზუსტა.

მსგავსი ინფორმაციები გვხვდება გერმანიის, საფრანგეთის, ისრაელის და სხვა საელჩოების შემთხვევაშიც.

გაიგეთ მეტი გავრცელებულ ჩანაწერებზე: