ერთიანი ნაციონალური მოძრაობის ერთ-ერთმა ლიდერმა, ხატია დეკანოიძემ გავრცელებულ ფაილებთან დაკავშირებით ქუთაისის პროკურატურაში სარჩელი შეიტანა. ის აღნიშნავს, რომ ყველა, ვისი საუბარიც ამ ფაილებში მოხვდა, ანალოგიურად უნდა მოიქცეს.

"ყველამ, ვისზეც არის ინფორმაცია და გავიდა ინფორმაცია საჯარო სივრცეში, ანუ იმ მასალებში, რომელიც ყველამ ვნახეთ, რომ ტოტალური კონტროლი და ფარული მიყურადებაა სუს-ის მიერ, ყველა ადამიანმა უნდა შეიტანოს სარჩელი სამართალდამცავ უწყებებში. [...] ეს იყო რეალურად ჩემი საუბარი, ფარული მიყურადება სხვადასხვა საელჩოს წარმომადგენლებთან, შესაბამისად, მე დღეს შემაქვს სარჩელი" — აცხადებს დეკანოიძე.

ამის მიუხედავად, დეკანოიძე ამბობს, რომ ქართული ოცნების ხელისუფლებაში ყოფნის პერიოდში გამოძიების იმედი არ აქვს.

"მე გულწრფელად მინდა ყველას ვუთხრა, არ მაქვს იმედი, რომ ამ შემთხვევაში ეს პროკურატურა, ან სუს, ან შინაგან საქმეთა სამინისტრო გამოიძიებს აი ამ მასიურ, ტოტალურ კონტროლს ადამიანებზე, მაგრამ, მაშინ, როდესაც ქართული ოცნება ხელისუფლებას ჩამოცილდება, მაშინ, როდესაც ჩვენ გვექნება თავისუფალი მართლმსაჯულების სისტემა, პროკურატურა, რომელსაც ეყოლება დამოუკიდებელი პროკურორი, ეს ჩემი განცხადება და ყველას განცხადება, ვინც აი, ამ ტოტალურ კონტროლს გააპროტესტებს, დარწმუნებული ვარ, გამოძიებული იქნება", — აღნიშნავს დეკანოიძე.

ფარულ ჩანაწერებთან დაკავშირებით სამართლებრივი დავა 18 სექტემბერს პარტია დროამაც დაიწყო.


13 სექტემბერს ცნობილი გახდა, რომ ერთ-ერთი ღია წყაროზე სასულიერო პირებთან დაკავშირებით მასალები აიტვირთა. უცნობია, ვინ გაავრცელა ფაილები და ასევე, არ არის დადასტურებული მათი ავთენტურობა. თუმცა რამდენიმე პოლიტიკოსმა და ჟურნალისტმა, მათ შორის On.ge-ს ყოფილმა რედაქტორმა განაცხადეს, რომ ჩანაწერებში საკუთარი საუბრები ამოიცნეს.

ჩანაწერების მიხედვით, უსმენენ და უთვალთვალებენ ელჩებსა და საელჩოების თანამშრომლებსაც. ფაილებში დაარქივებულია ევროკავშირის ელჩისა და მისი თანამშრომლის საუბარი. თავდაპირველად, ელჩი თანამშრომელს პროტოპრესვიტერ გიორგი ზვიადაძის ნომერს სთხოვს, შემდეგ კი მიმდინარე საკითხებზე თავის პოზიციას აფიქსირებს.

დოკუმენტებში არის ინფორმაცია ამერიკის საელჩოს წარმომადგენლების შესახებაც. მაგალითად, მითითებულია, რომ ელჩის თანაშემწეს დაუკავშირდა USAID-ის წარმომადგენელი და კონკრეტული შეხვედრის მონაწილეების შესახებ ინფორმაცია დააზუსტა.

მსგავსი ინფორმაციები გვხვდება გერმანიის, საფრანგეთის, ისრაელის და სხვა საელჩოების შემთხვევაშიც.

გაიგეთ მეტი გავრცელებულ ჩანაწერებზე: