მის დიდი ბრიტანეთის ერთ-ერთი მონაწილე, 31 წლის ელ სელინი, რომელიც სკოლაში გარეგნობის გამო ბულინგის მსხვერპლი არაერთხელ გამხდარა, კონკურსზე მაკიაჟის გარეშე გამოვა.

ნახევრად ბრიტანელი და ნახევრად ბერძენი ელი სკოლაში თანატოლებისგან გარეგნულად განსხვავდებოდა. მისი თქმით, განსხვავებული გარეგნობის, სხეულზე მეტი თმისა და ხვეული თმის გამო თანატოლები ხშირად ჩაგრავდნენ.

"განსხვავებული კულტურის წარმომადგენელი ვარ. ხშირად დამცინოდნენ სხეულის ფორმის გამო, ასევე, ძალიან ხვეული თმა მქონდა და ყოველთვის ამბობდნენ, რომ ტილები მყავდა და გორილა ვიყავი, რადგან სახესა და იღლიაში მათზე მეტი თმა მქონდა", — ამბობს ელი.

ფოტო: ELLE SELINE

ამის გამო 13 წლის ასაკში თმის გაპარსვა, დასწორება და მაკიაჟის ტარება დაიწყო.

"ჩემი კანის ფერზე ღია ტონალური მესვა, რადგან ძალიან მინდოდა, ჩემი ადგილი მეპოვა. დღეს ფილტრები და აპლიკაციები სწორედ იმას აკეთებს, რასაც მე სკოლაში ვაკეთებდი", — ამბობს ელი.

მის დიდი ბრიტანეთის კონკურსის ახალ კატეგორიაში, რომელიც 27-38 წლის ქალებისთვის იმართება, ელიმ მონაწილეობა შარშანაც მიიღო, თუმცა მაშინ მაკიაჟს ატარებდა. წელს ახალი თაობის მხარდასაჭერად და გასაძლიერებლად, მათთვის თავდაჯერების გასაზიარებლად, კონკურსზე უმაკიაჟოდ გამოვა.

"შეიძლება ეს სკოლის მოსწავლე გოგომ ნახოს და იგრძნოს, რომ საკმარისად კარგია ისეთი, როგორიც არის", — აღნიშნავს ელი.

ელის თქმით, თავდაჯერებულობა ლოქდაუნში შეიძინა, როდესაც მაკიაჟის გაკეთების წნეხს აღარ გრძნობდა. ელიმ ისწავლა, თუ როგორ მიეღო საკუთარი თავი ისეთი, როგორიც არის. დარწმუნებულია, რომ კონკურსზე უამრავი ადამიანის წინ გასვლა რთული იქნება, თუმცა გრძნობს, რომ მიუხედავად შედეგისა, საკუთარი თავით აუცილებლად იამაყებს.

"ვალდებული ვართ, მომდევნო თაობას ვუთხრათ: "შეგიძლია, საკუთარი თავი იყო".