იმ ფონზე, როდესაც დასავლური ჯარები 1 სექტემბრამდე ავღანეთიდან, რაც შეიძლება მეტი, ადამიანის გამოყვანას ცდილობენ, აშშ-მა და მოკავშირეებმა ქაბულის აეროპორტის დატოვებისა და არმისვლისკენ მოუწოდებენ. Reuters-ის ინფორმაციით, ეს გადაწყვეტილება ISIS-ის აეროპორტზე შესაძლო თავდასხმის საფრთხის გამო დღეს, 26 აგვისტოს, მიიღეს.

თალიბანის მიერ რამდენიმე დღის წინ დასავლეთის მიმართ გაჟერებულმა მუქარამ, რომ 31 აგვისტოს მერე ავღანეთში მათი დარჩენა ე.წ. წითელი ხაზი იქნება და თალიბანი მოქმედებას დაიწყებს, ევაკუაციაზე ზეწოლა გააძლიერა — დასავლეთი ცდილობს, ქვეყნიდან გაიყვანოს ათიათასობით უცხოელი და ავღანელი, რომლებიც თალიბანის წინააღმდეგ 20-წლიანი ომის დროს ეხმარებოდნენ.

გუშინ, 25 აგვისტოს, აშშ-ის საელჩომ ავღანეთში საკუთარ მოქალაქეებს ქაბულის აეროპორტში მისვლისგან დროებით თავის შეკავება ურჩია. უკვე ადგილზე მყოფი მოქალაქეებისთვის კი გაიცა ადგილის დატოვების რეკომენდაცია. თუმცა, არ იყო განმარტებული, რა საფრთხის გამო გაიცა ეს მითითება.

ბრიტანეთის შეიარაღებული ძალების მინისტრმა, ჯეიმს ჰეპეიმ, კი განაცხადა, რომ ISIS-ის თვითმკვლელი მებრძოლების მოსალოდნელი ტერორისტული თავდასხმების შესახებ დაზვერვის სამსხური "უფრო მტკიცე" გახდა.

ეს საფრთხე გამოცემასთან NATO-ს ერთ-ერთმა დიპლომატიურმა წარმომადგენელმაც ახსენა, რომელმაც საკუთარი ვინაობის მითითება არ ისურვა. მისი თქმით, ISIS-ის ტერორისტების თავდასხმის უგულვებელყოფა ვერ მოხდება, მიუხედავად იმისა, რომ თალიბანი აეროპორტში უსაფრთხოების გარანტიას იძლევა.


ავღანეთიდან აშშ-ის ძალების გასვლის შემდეგ, თალიბანმა მალევე შეძლო და ქაბულიც აიღო – პრეზიდენტი გაიქცა, თალიბებმა ძალაუფლება მოიპოვეს. მათ ხელისუფლების ყველა წარმომადგენლისათვის საყოველთაო "ამნისტია გამოაცხადეს" და მთავრობაში ქალები მიიწვიეს. მათი მტკიცებით, ხალხს შეუძლია, დაუბრუნდეს თავის რუტინულ ყოველდღიურობას, თუმცა ამის ფონზე, დევნიან ქუჩაში დამოუკიდებლობის დღის აღსანიშნავად გამოსულ მოქალაქეებს, ქალებს, რომლის ჩაცმის სტილიც არ მოსწონთ, ჟურნალისტებს. ბოლო დღებში თალიბებმა ათამდე მოკლეს და არაერთი დაჭრეს, მათ შორის, ისინი, ვინც ქვეყნიდან გაქცევას ცდილობდნენ. ბოლო დღეებში ავღანეთში გარდაცვლილთა რაოდენობის შესახებ ზუსტი მონაცემები არ არსებობს და მედიაში სხვადასხვა მონაცემი ვრცელდება. ავღანეთის ხელისუფლების ნაწილი, რომელსაც სათავეში ვიცე-პრეზიდენტი ამრულაჰ სალეჰი უდგას, დანებებას არ აპირებს. ის სამხედრო მეთაურ აჰმად მასუდთან ერთად მომხრეებს პანჯშირის ხეობაში კრებს. ცოტა ხნის წინ ცნობილი გახდა, რომ თალიბანის ხელმძღვანელობამ ასობით მებრძოლი პანჯშირის ხეობის ასაღებად გაგზავნა. თუმცა, შედეგების შესახებ ჯერეჯრობით არაფერია ცნობილი. საერთაშორისო საზოგადოებამ კი თალიბანისთვის ეკონომიკური სანქციების დაწესება დაიწყო.