თბილისში, საბურთალოზე, ოთარ ლორთქიფანიძის ქუჩაზე, კორპუსის გვერდით კლდე ჩამოინგრა. ინფორმაცია და ამის ამსახველი ფოტოები On.ge-ს ადგილობრივმა მცხოვრებმა მიაწოდა. მისი ინფორმაციით, მიწის მასა 19:10-სა და 19:15 საათის შუალედში ჩამოიშალა.

ადგილობრივი ცხოვრები გვიყვება, რომ ადგილზე დაახლოებით ორი კვირაა კორპუსის მშენებლობა მიმდინარეობს. მისი ინფორმაციით, სამუშაო დღე უკვე დასრულებული იყო, ამიტომ ტერიტორიაზე მუშები არ იყვნენ.

On.ge თბილისის მერიას დაუკავშირდა, სადაც გვითხრეს, რომ შემთხვევის ადგილზე სპეციალური ჯგუფი გაუშვეს, თუმცა დამატებით ინფორმაციას ამ ეტაპზე არ ფლობენ. მეტ დეტალს უწყებისგან ოფიციალური ინფორმაციის მიღებისთანავე მოგაწვდით.

განახლება:

თბილისის მერიის ინფორმაციით, ადგილზე იმყოფებიან როგორც მერიის, ასევე გარემოს დაცვის და 112-ის თანამშრომლები. უწყების ცნობით, ისინი სწავლობენ შექმნილ ვითარებას და პირველადი შეფასების გაკეთებისთანავე საზოგადოებას ინფორმაციას მიაწვდიან.