ავტორისათვის პერსონაჟი შვილივითაა. შემოქმედებითი ცხოვრების ერთ მომენტში უცნობი ვიღაც ჩნდება და შემდეგ მას მთელი ცხოვრება თან დასდევს. ან, არცთუ იშვიათად ისეც ხდება, რომ პერსონაჟის გამოჩენა იქცევა შემოქმედებითი ცხოვრების დასაწყისად ხოლმე. ამიტომ, რა გასაკვირია, რომ შვილის სახელის მოფიქრებაზე არანაკლებ საპასუხისმგებლო მისია საკუთარი პერსონაჟის მონათვლაა; ამას კი, შესაძლოა, დიდი დროც დასჭირდეს — ჯერ პერსონაჟი, მისი წარმომავლობა და ხასიათი უნდა გაიცნო, შემდეგ კი იმაზეც იფიქრო, რა სახელი შეჰფერის ასეთ ადამიანს ყველაზე მეტად.

სწორედ ასე ხდება, რომ უკვე მონათლული პერსონაჟის გადანათვლა და სახელის შეცვლა ხდება ხოლმე საჭირო. არაერთ ცნობილ პერსონაჟს თავდაპირველად ისეთი სახელი ერქვა, როგორითაც მათ ახლა ვეღარც კი წარმოვიდგენთ.

ამ სტატიაში სწორედ ასეთ გმირებს წარმოგიდგენთ.

1. გენდალფი ჰობიტიდან

ფოტო: PIERRE VINET/NEW LINE

ბლადორთინი გახსოვთ? რა თქმა უნდა, გემახსოვრებათ. თუმცა, ტოლკინს ეს სახელი ჯადოქრისთვის ჰქონდა მოფიქრებული, თავად გენდალფი კი ჯუჯების ლიდერი უნდა ყოფილიყო. მოგვიანებით, ლეგენდარული ფენტეზი საგის ავტორმა გადაწყვიტა, სახელები გადაენაცვლებინა და წვერიანი მაგი გენდალფი გამხდარიყო, ბლადორთინი კი მკვდარი მეფე ყოფილიყო, რომელიც ტოლკინის შემოქმედებაში მხოლოდ ერთხელაა ნახსენები.

2. ჰერმიონ გრეინჯერი ჰარი პოტერიდან

ფოტო: WB

პოტერიადის ტვინიკოსა პერსონაჟის გვარი თავდაპირველად პაკლი უნდა ყოფილიყო, თუმცა, როულინგის თქმით, პერსონაჟს ეს სულაც არა შეეფერებოდა. ამიტომ, ავტორმა გადაწყვიტა, ჰერმიონისთვის ისეთი გვარი მოეფიქრებინა, რომლის წარმოთქმაც ჟელიბონისგან დატოვებულ გემოს არ მოგაგონებს.

3. სკარლეტ ო'ჰარა ქარწაღებულნიდან

ფოტო: Snap / Rex

სკარლეტ ო'ჰარას თავისმა შემოქმედმა ლამის პენსი დაარქვა. ლეგენდარულ პერსონაჟს სახელი წიგნის დაბეჭდვამდე არცთუ დიდი ხნით ადრე შეეცვალა.

4. ჰოლი გოლითლი წიგნიდან საუზმე ტიფანისთან

ფოტო: Alamy

წიგნის საუზმე ტიფანისთან პირველ ვერსიაში ჰოლი გოლითლის სახელი და გვარი კონი გუსტაფსონი იყო. კეპოუტიმ თავის პერსონაჟს სახელი უკვე ნაბეჭდ მანუსკრიპტზე გადაუსწორა.

5. დრაკულა დრაკულადან

ფოტო: AP

ბრემ სტოკერის ჩანაწერების მიხედვით, მწერალი თავის სახელგანთქმულ პერსონაჟს მხოლოდ "გრაფით" მოიხსენიებდა, რომელსაც ტექსტში ცარიელი ადგილი, მოკლე ხაზი ან, უბრალოდ, "ვამპირი" მოჰყვებოდა ხოლმე. მოგვიანებით, როცა სტოკერმა სახელ "დრაკულას" მიაგნო, გაკრული ხელით მიაჯღაბნა ჩანაწერების ზედა კუთხეში და ხაზი გაუსვა. მკვლევრების თქმით, მწერალი თავისი ანტიგმირისთვის შერჩეული სახელის ჟღერადობას ცდიდა. ნავარაუდევია, რომ სტოკერმა "დრაკულა" პირველად საჯარო ბიბლიოთეკაში გაიგონა, როცა ცოლთან და შვილთან ერთად 1890 წელს უიტბის ესტუმრა.

6. შერლოკ ჰოლმსი ალისფერი კვალიდან

ფოტო: Robert Viglasky / BBC / PA

ართურ კონან დოილს თავისი ცნობილი პერსონაჟისთვის დასარქმევი სახელებით მთელი გვერდი ჰქონდა გავსებული: მისტერ შარპსი, მისტერ ფერეტსი, შერინგფორდ ჰოლმსი და სხვა. საბოლოოდ, იგი შერლოკ ჰოლმსზე შეჩერდა. კონან დოილი ამერიკელ იურისტს, ოლივერ უენდელ ჰოლმსს იცნობდა, სახელი შერლოკის ინსპირაცია კი, სავარაუდოდ, ან ინგლისელი სპორტსმენი, ფრენკ შეკლოკი იყო, ან მწერლის სკოლის პერიოდის მეგობარი, პატრიკ შერლოკი.

7. ექიმი უოტსონი შერლოკ ჰოლმსიდან

სხვათა შორის, სხვა სახელი მარტო ჰოლმსს კი არა, მის განუყრელ მეწყვილესაც ჰქონდა. ექიმ უოტსონს თავდაპირველად ორმონ სეკერი ერქვა, თუმცა, ავტორმა იფიქრა, რომ ამ პერსონაჟისთვის ნაკლებად უცნაური სახელი აჯობებდა — ამგვარად კი, სავარაუდოდ, თავისი მეზობლის, ექიმი ჯეიმს უოტსონის, გვარი მიიჩნია.

8-10. სამი პევენსი ნარნიის ქრონიკებიდან

ფოტო: Disney Enterprises, Inc. / Walden Media

ერთადერთი პევენსი, რომელსაც ნარნიის ქრონიკების მონახაზშიც ის სახელი ერქვა, რაც ახლა ჰქვია, პიტერია, თუმცა, მისი ასაკი და როლი ოჯახში წინათ განსხვავდებოდა. ლომი, კუდიანი და გარდერობის პირველ ვერსიაში პიტერი არა ყველაზე უფროსი, არამედ ყველაზე უმცროსი ძმა იყო ენის, მარტინისა და როუზისთვის.