საქართველოს პარლამენტის ყოფილი თავმჯდომარე და ამჟამინდელი ვიცე-სპიკერი, არჩილ თალაკვაძე აცხადებს, რომ 5 ივლისს ხელისუფლებას "თვითონ" ჟურნალისტებზე არ უძალადია და არც იძალადებს. ამის შესახებ მან ტელეკომპანია იმედის ეთერში ისაუბრა. ძალადობრივი და ჰომოფობიური კონტრაქციის ორგანიზატორების დასჯაზე საუბრისას თალაკვაძემ ნაციონალური მოძრაობის პერიოდი და იმედში შესვლა გაიხსენა. მისი თქმით, "დღეს სრულიად განსხვავებულ ვითარებაში ვართ".

"ხელისუფლება არ ყოფილა ამ შემთხვევაში მოძალადე, ხელისუფლების მოვალეობა იყო მხარეთა დაშორიშორება და მოძალადეების დასჯა. ხელისუფლებას თვითონ ჟურნალისტებზე არ უძალადია და არც იძალადებს, სანამ ქართული ოცნება არის ხელისუფლებაში", — თქვა თალაკვაძემ.

ვიცე-სპიკერმა აღნიშნა, რომ ამ დროისთვის 30-მდე ადამიანია დაკავებული — ისინი, რომელთა მიმართაც მტკიცებულებების შეგროვება მოხდა. მისივე თქმით, გამოძიება გრძელდება და "ნებისმიერ ქვეყანაში, იქნება ეს ევროპა თუ აშშ", ეს თვეების განმავლობაში გრძელდება.

ჟურნალისტის კითხვას, თეა წულუკიანის მიერ მთავარი არხის კორესპონდენტისთვის მიკროფონის გამორთმევა ხომ არ იქნება ცუდი მაგალითი მოქალაქეებისთვის, თალაკვაძე პირდაპირ არ პასუხობს. ის აქაც მედიას აკრიტიკებს და "სიღრმისეულ" პრობლემებზე საუბრობს. კერძოდ, მისი აზრით, 2012 წლის შემდეგ, "როდესაც ხელისუფლების კონტროლი მოიხსნა", საზოგადოებას ჰქონდა მოლოდინი, რომ მედია გახდებოდა მიუკერძოებელი, თუმცა ნაწილი პროპაგანდისტული გახდა და ოპოზიციის კონტროლის ქვეშაა.

ამასთან, თალაკვაძე ამტკიცებს, რომ სახელმწიფომ გაატარა პრევენციული ზომები 5 ივლისის წინა დღეებში, რომ "უშუალოდ პრაიდის ორგანიზატორებისა და მონაწილეების მიმართ ძალადობა აღეკვეთა და ეს მთელმა საზოგადოებამ ნახა პირდაპირ ეთერში.

"რაც შეეხება 5 ივლისს, იქ, იმ სივრცეში არ ყოფილან პრაიდის მონაწილეები და ორგანიზატორები. მოხდა ისე, რომ ერთ რადიკალურად განწყობილ ჯგუფსა და ჟურნალისტებს შორის მოხდა კონტაქტი და მოხდა ძალადობა ჟურნალისტებზე, რაც არის მიუღებელი, რაზეც სახელმწიფოს უკვე აქვს და მომავალშიც ექნება პრინციპული რეაგირება", — თქვა მან.

თუმცა თალაკვაძეს არაფერი უთქვამს იმაზე, რომ ღირსების მარში სწორედ ძალადობის საფრთხის გამო გადაიდო. მართალია, "იქ, იმ სივრცეში" პრაიდის ორგანიზატორები არ ყოფილან, მაგრამ იყვნენ სხვადასხვა ოფისში, რომელთა ნაწილი ძალადობრივმა ჯგუფებმა დაარბიეს და ხელისუფლებამ ეს ვერ აღკვეთა.

ცნობისთვის, მას შემდეგ, რაც 5 ივლისს ჰომოფობიური და ძალადობრივი ჯგუფები ჟურნალისტებს ფიზიკურად გაუსწორდნენ, დაარბიეს თბილისი პრაიდის ოფისი და თავს დაესხნენ სირცხვილიას ოფისს, მედია აქციებს მართავს. 11 ივლისს გარდაიცვალა TV პირველის ოპერატორი, ლექსო ლაშქარავა, რომელსაც 5 ივლისს ძალადობრივმა ჯგუფებმა სცემეს. ამის შემდეგ მედიის საპროტესტო ღონისძიებები უფრო გააქტიურდა და მოძალადეებისა და ორგანიზატორების დასჯის გარდა, მოთხოვნაა პრემიერმინისტრმა ღარიბაშვილმა აიღოს პოლიტიკური პასუხისმგებლობა. მედიის პროტესტისა და კრიტიკის შემდეგ, პრემიერმინისტრმა გასულ კვირას საჯარო ღონისძიებაზე კრიტიკული მედია დაბლოკა და არ მიიწვია. რამდენიმე დღეში ვიცე-პრემიერმა თეა წულუკიანმა მთავარი არხის ჟურნალისტს მიკროფონი წაართვა და პროფესიული მოვალეობის შესრულებაში ხელი შეუშალა. ის მიკროფონს ამ დრომდე არ აბრუნებს, შსს კი არ ამბობს, დაიწყო თუ არა გამოძიება