ოპოზიციის ნაწილი ხულიგნობისა და პოლიციისადმი დაუმორჩილებლობისთვის გაზრდილი სანქციების შემცირებას ითხოვს

ოპოზიციონერი დეპუტატების ნაწილი წვრილმანი ხულიგნობისა და პოლიციელისადმი დაუმორჩილებლობისთვის გაზრდილი სანქციების შემცირებას ითხოვს. საუბარია 29 აპრილს მიღებულ ცვლილებაზე, რომელიც ძალაში 1-ლი ივნისიდან შევიდა.

თითქმის სამი თვის წინ მიღებული ცვლილების გაუქმებისა და საკანონმდებლო ჩანაწერის ძველი ვერსიის დაბრუნების ინიციატორები ფრაქცია შარლ მიშელის რეფორმების ჯგუფის თავმჯდომარე, ხათუნა სამნიძე და წევრები — გიორგი ვაშაძე, პაატა მანჯგალაძე და თეონა აქუბარდია არიან. შესაბამისი კანონპროექტი დღეს, 23 ივლისს, ადამიანის უფლებათა დაცვისა და სამოქალაქო ინტეგრაციის კომიტეტის სხდომაზე ავტორმა, გიორგი ვაშაძემ წარადგინა.

მისი თქმით, ეს პირდაპირ ეხება გამოხატვის თავისუფლებას, სანქციების გამკაცრება კი იწვევს მსუსხავ ეფექტს — მოქალაქეები უარს იტყვიან პროტესტზე.

"პირდაპირ, მიზანმიმართულად, ქართულმა ოცნებამ მიიღო კანონი, რომლითაც, ყველა ადამიანს, ვისაც უნდა პროტესტის გამოხატვა ქვეყანაში, უთხრა — გამოხატავ პროტესტს? ორჯერ მეტით დაგაჯარიმებ [...] ეს არის ნამდვილად ანტიდემოკრატიული კანონი. აქედან გამომდინარე, ჩვენ ვამბობთ, რომ როგორც მინიმუმ, უნდა დაბრუნდეს ის რედაქცია, რაც იყო", — ამბობს ვაშაძე.

მან აღნიშნა, რომ სანქციები ამ მუხლებით გათვალისწინებულ სამართალდარღვევებზე ისედაც მაღალი იყო, თუმცა პირველ ეტაპზე უნდათ კანონპროქტის ძველი ვერსიის დაბრუნება, ხოლო შემდეგ, შესაძლოა საუბარი იყოს მთელი კოდექსის ცვლილებაზე.

კომიტეტის თავმჯდომარემ, მიხეილ სარჯველაძემ ინიციატივას კომიკური უწოდა. იგი ამბობს, რომ გაზრდილ სანქციებს გამოხატვის თავისუფლებაზე მსუსხავი ეფექტი არ ექნება, თუ პროტესტი კანონით განსაზღვრულ ფორმებში მოექცევა.

"საუბარია სამართალდარღვევაზე. როდესაც გამოხატვის თავისუფლებასთან მიმართებით მსუსხავ ეფექტზე გვაქვს საუბარი, აქვე არ დაგვავიწყდეს, რომ ყველას აქვს თავისუფლება გამოხატვის თავისუფლება მოაქციოს სამართლებრივად განსაზღვრულ ფარგლებში", — განაცხადა მიხეილ სარჯველაძემ.

ცვლილებები ადმინისტრაციულ კოდექსში

29 აპრილს პარლამენტმა ადმინისტრაციულ სამართალდარღვევათა კოდექსში ცვლილებები მესამე მოსმენით დაამტკიცა. კანონპროექტს საკანონმდებლო ორგანო დაჩქარებულად განიხილავდა. ცვლილებები 2021 წლის პირველი ივნისიდან ამოქმედდა.

ცვლილების თანახმად, ადმინისტრაციულ სამართალდარღვევათა კოდექსში ცვლილებები შედის, რის შედეგადაც წვრილმანი ხულიგნობისა (166-ე მუხლი) და სამართალდამცველის მოთხოვნისადმი დაუმორჩილებლობისთვის (173-ე მუხლი) სანქციები იზრდება.

წვრილმან ხულიგნობაზე პირველი ადმინისტრაციული დარღვევის შემთხვევაში, სანქცია რჩება იგივე, ანუ 500-დან 1000 ლარამდე ჯარიმა ან 15 დღემდე პატიმრობა. განმეორებითი სამართალდარღვევის შემთხვევაში ჯარიმა იქნება 1 500-დან 2 000 ლარამდე ან 5-დან 15 დღემდე პატიმრობა.

რაც შეეხება სამართალდამცველის მოთხოვნისადმი დაუმორჩილებლობისთვის, აღნიშნული სამართალდარღვევა გამოიწვევს დაჯარიმებას 2 000-დან 3 000 ლარამდე ან პატიმრობას 15 დღემდე ვადით. განმეორების შემთხვევაში 3 500 ლარიდან 4 500-ლარამდე ჯარიმა ან 7-დან 15 დღემდე პატიმრობა.

ამასთან ცვლილება ეხება პატიმრობასაც. 247-ე მუხლი ჩამოყალიბდა შემდეგი რედაქციით:

ადმინისტრაციული დაკავების დროს, დაკავებული პირი პირველი შესაძლებლობისთანავე, მაგრამ არა უგვიანეს 24 საათისა წარედგინება სასამართლოს.
მტკიცებულების მოპოვების მიზნით, ამ მუხლის პირველი ნაწილით გათვალისწინებული ვადა შეიძლება ერთჯერადად გახანგრძლივდეს არაუმეტეს 24 საათით. ამ შემთხვევაში უფლებამოსილი ორგანოს შესაბამისი თანამშრომელი წერილობით ასაბუთებს ადმინისტრაციული დაკავების ვადის გახანგრძლივების მიზანშეწონილობას.
თუ დაკავებული პირი ამ მუხლის პირველი ან მეორე ნაწილით გათვალისწინებულ ვადაში არ წარედგინა სასამართლოს, იგი დაუყოვნებლივ უნდა გათავისუფლდეს.
დაკავებული პირი სასამართლოსთვის წარდგენამდე უფლებამოსილმა ორგანომ შეიძლება მოათავსოს დროებით მოთავსების იზოლატორში.

გაიგე მეტი:

ბოლო ამბები:

გირჩევთ