ორგანიზაციამ პარტნიორობა ადამიანის უფლებებისთვის (PHR) ნინოწმინდის პანსიონიდან ბავშვების გამოყვანის მოთხოვნით სასამართლოს მიმართა. როგორც PHR-ს წარმომადგენელმა, ანა არგანაშვილმა On.ge-ს განუცხადა, მათი მოთხოვნები უფრო გამკაცრდა მას შემდეგ, რაც სხვადასხვა შესაძლო დანაშაულების შესახებ ინფორმაციები გავრცელდა.

"მოთხოვნები შეიცვალა, ვინაიდან, როცა გაეროს მივმართეთ და მანამდე საქალაქო სასამართლოს, ვითხოვდით ამ წუთში მხოლოდ სახალხო დამცველის შესვლას მონიტორინგზე, მაგრამ ვინაიდან გავრცელდა ძალიან შემაშფოთებელი ინფორმაცია იქ შესაძლო დანაშაულების შესახებ, მათ შორის, სქესობრივი დანაშაული და იქ ყოფილმა აღსაზრდელებმა ისაუბრეს ძალადობრივ ატმოსფეროსა და გარემოზე, ჩვენი მოთხოვნა უფრო გამკაცრდა და დღეს უკვე მარტო სახალხო დამცველის შესვლას არ ვითხოვთ, ვითხოვთ ბავშვების დაუყოვნებლივ გამოყვანასა და უსაფრთხო ადგილას გადაყვანას", — განაცხადა მან.

მისივე თქმით, აქვთ მოლოდინი, რომ მათი მოთხოვნები დაკმაყოფილდება, წინააღმდეგ შემთხვევაში, გადაწყვეტილებას გაასაჩივრებენ.

"ჩვენ ყოველთვის ველით, რომ სამართლიანობა და კანონიერება გაიმარჯვებს, სხვანაირად ვერ ვიცხოვრებთ ამ ქვეყანაში. თუ არ დაკმაყოფილდება დღესვე გასაჩივრდება და აპელაციასაც დღეს მოვითხოვთ. თქვენ იცით, რომ წინა შემთხვევაში ჩვენ აპელაციაში კი არა, გაეროში წავედით, ახლაც წავალთ. საქართველოს სასამართლო როცა ვერ ხედავს ბავშვთა უფლებების დარღვევებს, საბედნიეროდ, საერთაშორისო სასამართლოები ხედავენ", — აღნიშნა არგანაშვილმა.

დღეს, 4 ივნისს სახელმწიფო ზრუნვის სააგენტომ განაცხადა, რომ დაწესებულების დატოვების სურვილი 6-მა არასრულწლოვანმა გამოთქვა, ხოლო კიდევ 10-თან მიმდინარეობს მუშაობა.

2 ივნისს სახალხო დამცველმა გაავრცელა ინფორმაცია, რომ ნინოწმინდის ამბავზე გამოძიება გაუპატიურების მუხლითაც მიმდინარეობს. ომბუდსმენის განცხადებით, პროკურატურიდან გამოთხოვილი ინფორმაციით ირკვევა, რომ 2016-2021 წლებში დაწყებულია ოთხი სისხლის სამართლის საქმის გამოძიება არასრულწლოვნების მიმართ სავაურო ძალადობის საქმეებზე.

3 ივნისს მედიაში გავრცელდა პანსიონის ყოფილი ბენეფიციარის ინტერვიუ, სადაც ის ფიზიკურ და ფსიქოლოგიურ ძალადობაზე საუბრობს. იმავე დღეს შსს-მ გაავრელა განცხადება, სადაც აღნიშნულია, რომ ძველ მიმდინარე საქმეებზე მათ საკმარისი მტკიცებულებები არ აქვთ, ახალ გავრცელებულ ინფორმაციაზე კი გამოძიება დაიწყეს.


15 აპრილს სახალხო დამცველის წარმომადგენელი საპატრიარქოს ნინოწმინდის წმინდა ნინოს ობოლ, უპატრონო და მზრუნველობამოკლებულ ბავშვთა პანსიონში არ შეუშვეს. ომბუდსმენის აპარატში აცხადებენ, რომ ამის მიზეზად, დაწესებულების წარმომადგენელმა სხალთის მთავარეპისკოპოსის, მეუფე სპირიდონის მითითება დაასახელა. განმარტება გააკეთა თავად სპირიდონმაც და ჰომოფობიური მიზეზი დაასახელა — მისი თქმით, პანსიონში ომბუდსმენის წარმომადგენლებს იმიტომ არ უშვებს, რომ "ერთნაირსქესიანთა ქორწინების დაკანონებას ითხოვენ და ასეთებს თავის ბავშვებს საჯიჯგნად ვერ მისცემს".

ამის შემდეგ ორგანიზაციამ პარტიონორობა ადამიანის უფლებებისთვის თბილისის საქალაქო სასამართლოს მიმართა და მთავრობისგან ნინოწმინდის პანსიონში ყველა შესაბამისი უწყების მიერ მონიტორინგის ჩატარების უზრუნველყოფა მოითხოვა. სასამართლოს ეს მოთხოვნა არ დააკმაყოფილა, თუმცა დააკმაყოფილა გაერომ და შესაბამისად, მთავრობა ვალდებულია, უზრუნველყოს მონიტორინგი.

რაც შეეხება სახელმწიფოს რეაქციას, 14 მაისს, პარლამენტში, ჯანდაცვის სამინისტროს სოციალური დაცვის პოლიტიკის სამმართველოს უფროსმა, დეპუტატ დავით სერგეენკოს კითხვის პასუხად თქვა, რომ ნინოწმინდის ბავშვთა პანსიონში ბოლო ერთი თვის განმავლობაში მეურვე-მზრუნველობის ორგანო მონიტორინგს სტანდარტულად ახორციელებს.

სახალხო დამცველის აპარატის ინფორმაციით, მათი წარმომადგენლები 19 მაისს ისევ იმყოფებოდნენ ნინოწმინდის ბავშვთა პანსიონში, თუმცა მონიტორინგის საშუალება კვლავ არ მიეცათ. როგორც ისინი ამბობენ, პანსიონის წარმომადგენლებმა მათთან საუბარი არ ისურვეს და მიზეზად ხელმძღვანელის მითითება დაასახელეს.

სახალხო დამცველის ინფორმაციით, ამჟამად პანსიონში 57 არასრულწლოვანი ირიცხება, მათგან ყველაზე პატარა 5 წლისაა. ომბუდსმენი ამბობს, რომ დაწესებულებაში მონიტორინგის შესაძლებლობა არც სახელმწიფო ზრუნვის სააგენტოს სოციალურ მუშაკს ეძლევა, რომელსაც 2020 წლის ივნისის შემდეგ პანსიონში არ შესულა.

"სახალხო დამცველისადმი სააგენტოს მიერ მოწოდებულ ოფიციალურ კორესპონდენციაში აღნიშნულია, რომ მეუფე სპირიდონი პანსიონში სოციალური მუშაკის ვიზიტების წინააღმდეგია, რაც ადგილზე სოციალურმა მუშაკმაც დაადასტურა".

სახალხო დამცველი წლებია აღნიშნავს, რომ ნინოწმინდის წმინდა ნინოს ბავშვთა პანსიონში განხორციელებულმა მონიტორინგებმა ბავშვთა მიმართ ძალადობის მწვავე ფაქტები და ბავშვების დასჯის შემთხვევები გამოკვეთა. პანსიონში მცხოვრები არასრულწლოვნები, ფაქტობრივად, იზოლირებულები არიან სოციუმიდან და პრობლემურია მათი ინდივიდუალური საჭიროებების დაკმაყოფილების საკითხი.