უნილაბი სკოლაში: დაფინანსებული კურსები სკოლის მოსწავლეებისთვის

ილიას სახელმწიფო უნივერსიტეტის საკვირაო სკოლა მთელი საქართველოს საშუალო საგანმანათლებლო სკოლის მოსწავლეებს სთავაზობს ახალ საგანმანათლებლო პროექტს "უნილაბი სკოლაში". პროექტი "უნილაბი სკოლაში" დისტანციურად განხორციელდება სკოლის მე-8-მე-12- კლასელებისთვის.

მოსწავლეებს შესაძლებლობა ექნებათ ღია ლექციების ფორმატით გაეცნონ თანამედროვე პროფესიებს, ასევე მოიპოვონ დაფინანსება ილიას სახელმწიფო უნივერსიტეტისგან და გაიარონ ილიაუნის კიბერლაბორატორია უნილაბის სამი პრაქტიკული კურსიდან ერთ-ერთი:

გრაფიკული დიზაინი
Unity 3D
C#

შერჩეული კანდიდატებისთვის კურსის გავლის ხარჯებს სრულად დაფარავს ილიას სახელმწიფო უნივერსიტეტი.

პროექტში მონაწილეობა შეუძლია მე-8-მე-12 კლასის ნებისმიერ მოსწავლეს, რომელიც დაინტერესებულია თანამედროვე ტექნოლოგიებით, სურს ამ მიმართულებით ცოდნის გაღრმავება და წარმატებით შეავსებს სააპლიკაციო ფორმას.

პროექტში მონაწილეობის მისაღებად საჭიროა მოსწავლემ მისთვის საინტერესო კურსის სააპლიკაციო ფორმა შეავსოს 2021 წლის 6 ივნისის ჩათვლით.

კურსის გრაფიკული დიზაინი სააპლიკაციო ფორმა — https://bit.ly/33u0q9b
კურსის Unity 3D სააპლიკაციო ფორმა — https://bit.ly/2R7KeI1
კურსის C# სააპლიკაციო ფორმა — https://bit.ly/3bfU01J

რას მომცემს პროექტში მონაწილეობა?

პროექტის ეტაპები

პროექტი სამ ეტაპად განხორციელდება.

პირველი ეტაპი მოიცავს სატესტო დავალებას, რომლის წარმატებით შესრულებაც განსაზღვრავს დაფინანსების მოპოვებისა და კურსის გავლის შესაძლებლობას.
მეორე ეტაპზე შერჩეული მოსწავლეები, რომლებიც ილიას სახელმწიფო უნივერსიტეტისგან მოიპოვებენ დაფინანსებას, გაივლიან სამი პრაქტიკული კურსიდან (გრაფიკული დიზაინი; Unity 3D; C#) ერთ-ერთს; სასწავლო პროცესი წარიმართება სინქრონულ-დისტანციურ ფორმატში (Synchronous distance learning). თითოეული კურსი მოიცავს 14 ლექციას. კურსის გავლის შემდეგ მოსწავლეები იმუშავებენ რეალურ პროექტებზე.
მესამე ეტაპზე კი მოსწავლეებს ექნებათ შესაძლებლობა კურსის ფარგლებში შეძენილ ცოდნაზე დაყრდნობით 1 თვის განმავლობაში იმუშაონ რეალურ პროექტებზე. ამ პერიოდში მათ კონსულტაციებს ლექტორები გაუწევენ.

პროექტის მონაწილეთ საშუალება ექნებათ შეიძინონ ცოდნა თანამედროვე პროფესიებში, ისარგებლონ უნილაბის სადისკუსიო სივრცით, დასვან შეკითხვები, მიიღონ რჩევები და რეკომენდაციები გამოცდილი ლექტორებისა და სტუდენტებისაგან, იმუშავონ რეალურ პროექტებზე და პრაქტიკაში გამოიყენონ მიღებული ცოდნა.

პრიზი

სკოლის მოსწავლეების მიერ შესრულებულ ფინალურ პროექტებს შეაფასებს პროექტის ჟიური. თითოეული კურსის ფარგლებში გამოვლინდება რჩეული პროექტი. რჩეული პროექტის ავტორი დასაჩუქრდება ილიას სახელმწიფო უნივერსიტეტის პირობებიანი სასტიპენდიო ვაუჩერით.

პროექტში მონაწილეობა სკოლის მოსწავლეებს შესაძლებლობას გაძლევთ:

მეტი ინფორმაცია მიიღოთ მომავლის პროფესიებზე;
ადრეული ასაკიდანვე აღმოაჩინოთ ინტერესის სფერო და შესაბამისად გაიღრმავოთ ცოდნა;
გაეცნოთ ისეთ ინფორმაციას, რომელიც სასკოლო პროგრამაში არაა გათვალისწინებული;
თეორიული ცოდნისა და პრაქტიკული დავალებების საშუალებით დაეუფლოთ თქვენთვის საინტერესო პროფესიის საფუძვლებს;
შეიძინოთ ახალი მეგობრები ტექნოლოგიების სამყაროდან.

პროექტის პარტნიორია: განათლების კოალიცია