ქართული ოცნების საზოგადოებასთან ურთიერთობის სამსახურის მდივანის, შალვა პაპუაშვილის თქმით, ნაციონალური მოძრაობა და ევროპული საქართველო გუშინ რადიკალური პარტიები ოფიციალურად გახდნენ.

"ჩვენ რაც გუშინ ვნახეთ, კერძოდ, ნაციონალურმა მოძრაობამ და ევროპულმა საქართველომ პირდაპირ ჩამოიხსნა ნიღაბი, რაზეც ვსაუბრობდით რომ ეს არის ის ორი ძალა, რომელიც ქვეყანაში სიტუაციას ურევს, რომელიც პირდაპირ მომართული იყო ჩაეშალა შეთანხმება. საზოგადოებამ პირდაპირ იხილა, რომ ნაციონალური მოძრაობა და ევროპული საქართველო პირდაპირ გახდნენ რადიკალური პარტიები ოფიციალურად, მათ შორის რუსეთის გზაზე დადგნენ იმ კუთხით. ჩვენმა ევროპელმა კოლეგებმა გვითხრეს, რომ არის ორი გზა — თამშრომლობისა და თანხმობის ევროპული გზა და არის მეორე შუღლის, გახლეჩვისა და ძალადობის გზით ხელისუფლებაში მოსვლის რუსული გზა", — განაცხადა პაპუაშვილმა.

ევროპული საბჭოს პრეზიდენტის, შარლ მიშელის ახალ დოკუმენტს შვიდმა პოლიტიკურმა პარტიამ და სამმა დამოუკიდებელმა დეპუტატმა მოაწერა ხელი. ხელმოწერის ცერემონია პრეზიდენტის სასახლეში გაიმართა. ხელმოწერის ცერემონიას ონლაინ დაესწრო შარლ მიშელიც.

ამ დროის მონაცემებით, დოკუმენტს ხელს აწერენ: ქართული ოცნება, ლელო, სრატეგია აღმაშენებელი, ორივე გირჩი, რესპუბლიკური პარტია, ასევე, ინდივიდუალურად აწერენ ხელს ნაციონალური მოძრაობის ერთ-ერთი ლიდერი, სალომე სამადაშვილი, ევროპული საქართველოს ყოფილი თავმჯდომარე, დავით ბაქრაძე და ევროპული საქართველოს წევრი, რამაზ ახვლედიანი.

ახალ დოკუმენტში საუბარია პოლიტპატიმრებზეც. კერძოდ, საუბარია იმაზე, რომ დოკუმენტის ხელმოწერიდან 1 კვირის განმავლობაში ორ შემთხვევაში, იგულისხმება ნიკა მელიასა და გიორგი რურუას საქმეები, იქნება ამნისტია ან სხვა ნაბიჯი, რომელსაც ანალოგიური შედეგი ექნება. საუბარია ამნისტიის კანონზეც, რომელიც 2019 წლის 20 ივნისის აქციებს ეხება. პარტიები ცვლილებების მხარდასაჭერად პარლამენტში უნდა შევიდნენ.

გარდა ამისა, დოკუმენტში საუბარია საარჩევნო რეფორმაზე, სადაც ვადამდელ არჩევნებთან დაკავშირებით ქართული ოცნების წინადადება გაზიარებულია, თუმცა ნაცვლად 40%-სა, შემოთავაზებულია 43%. კერძოდ, ვადამდელი არჩევნები ჩატარდება 2022 წელს, თუ 2021 წლის თვითმმართველობის არჩევნებში მმართველი პარტია 43%-ზე ნაკლებ პროპორციულ ხმას აიღებს.

დოკუმენტი მოიცავს სასამართლო რეფორმას, პარლამენტში ძალაუფლების გადანაწილებასა და მომავალ არჩევნებსაც.

ამავე თემაზე: